زرت النشاما

زرت النشاما فاتحين الدواوين

اللي لهم بالطيب صوله وجوله

اهل الكرم والجود بالعسر واللين

والكل منهم بينات فعوله

عيال منهو عند الاقصى والادنين

له سمعة مانالها بالسهوله

الناس لرشيد القفيدي محبين

ويسولفون اهل الوفا وشهدوله

لاجاله المحتاج ماقال بعدين

كنه بكبر الجاه مسؤول دوله

نال الوجاهه عند كل السلاطين

واهل القضايا المستحيله سعوله

كفه تمد الخير للمستحقين

صارت كفوف البعض  منها خجوله

كل النشاما للقفيدي مودين

ويوم الله اختاره بكوه ودعوله

ياسامعين لدعوتي قولوا آمين

عساه بالجنة يرافق رسوله

وانا سعيد بشوفتي للمسمين

عياله اللي بالفعول اتبعوله

تقديرهم عندي على الراس والعين

متقاسمين المجد عرضه وطوله

سعود وعبيد ومحمد علينا عزيزين

لاشافو الضيف المسير عدوله

واخوانهم معهم على العز وافين

من قال ابي فزعه مراده ينوله

الكل منهم له فعول وبراهين

اقول شي كل منصف يقوله

وسعود فاز بحب ناس عديدين

من طيب راسه كلهم صوتوله

من لابة وقت الملاقا شجيعين

يردون حوض الموت ماحسبوله

بني رشيد مرجحين الموازين

ياحظ منهو جالهم وفزعوله

‏

محمد السبيل