| د. سعيد فهمي |
الله يسامح اللي علمونا غلط في المدارس من زمان.. علمونا ان الطائفية هي معناها الخلاف والصراع بين المشايخ والرهبان.. لكن بالبحث الدقيق والتجربة الحيّة لقينا المصري هو المصري والمسلم زي المسيحي سيان.. أتاري الجميع ليهم نفس الملامح والسلوك وحب الانتماء والكل مواطن حتى النخاع عاوز يعيش في وطن مستقر وآمن يعني من الآخر محتاج للأمان.. والحمد لله على نعمة الوطن الواحد والمشهود له بالاستقرار والسكينة ووحدة الأديان.. مصر السلام ومُستقر الأنبياء وملتقى الأحبة من حد وصوب ومن كل مكان.. مصر أكبر من كل دسيسة ومن كل مؤامرة ومن كل بائس بيحاول يفرق ولادها بالدين أو بالسياسة مهما كانت قوته كائن من كان.. لكن ياخسارة الحلو ما يكملش لما تتجي المصالح الحزبية وحٌب السلطة والهيمنة تيجي وتنجح تفرق الثوار في الميدان.. شهوة الحُكم والغطرسة كانت كالسوس في العظم وكالنار في الهشيم بسبب تصريحات وهلفطة واحد عريان.. تفتح التليفزيون تلاقيه تفتح الحنفية تلاقيه وعالفيس وتويتر موجود وكأنها حالة اسهال اعلام رائحتها زكمت الأنوف لغياب الحكمة وعفة اللسان.. أسلوب التكبر والتخايل بالقوة مرفوض وكلنا عارفين كل حاجة وعارفين مين اللي فاز وازاي ده حصل ومين اللي اختار بطريقة «ليس حبا في عمرو ولكن نكاية في زيد» وده اللى حدث وكان.. الطائفية الحقيقية هي نتاج لتصريحات غير مسئولة استفزازية لمستشارين تحت التمرين ومسئولين لحزب بيمارس نفس أسلوب الحزب الوطني الفاسد اللي حكمنا ومازال بيحكمنا نفس التفكير رغم اختلاف الأشخاص والمُسمى لكن العنوان هو العنوان.. ياخسارة كنا بنتمناها ثورة وتغيير حقيقي من جوانا وتوحيد لكل المصريين وتميزهم ككيان.. كنا بنتمناها وحدة بين الجميع في الهدف والمصلحة ويبقى الوطن هو الفائز والمواطن يشعر بقيمته وصوته ويحس انه له قيمة كفرد ومواطن وانسان.. لكن ازدواجية التصريحات وأسلوب اضرب ولاقي وده يؤكد وده ينفي استفزت المواطن العادي من جماعة تدير البلاد وتعاملنا معاملة المريض في الموريستان.. أتاري فيه ناس مش عارفة يعني ايه ادارة دولة وازاي نتعامل مع شعب له من الحضارة باع طويل ويقدر يفرق بين الكوسة والقرع والباذنجان.. المشهد الآن واضح وظاهر وضوح الشمس في عز الظهر بيشوفه حتى العُميان.. جماعة من كوكب تاني بأدوار مختلفة بتتحفنا بتصريحات علنية وسرية بقيادة نجوم التوك شو صاحب المليون تصريح المستر عريان والبلتجي والمتحدث الرسمي السيد غزلان.. هؤلاء وبفضل الله نجحوا في اثارة الشعب كله وسلبوا منه الصبر على الحاكم وقسموا الأمة بأكملها الى فصيلين متنافرين قوى شعبية وطنية واخوان.. تمام نفس الحال ونفس الظروف بين الشعب والحزب الوطني اللي كانت النهاية بينهم واضحة وحاسمة هناك في الميدان..!! مش عارف ليه فيه ناس مش بتتعلم من الماضي وازاي بتعيد علينا أيام بنحاول نمحيها من حياتنا السياسية.. أسلوب اللي مش معايا يبقى ضدي قاعدين يحاولون يخلوه قاعدة ثابتة بين الطوائف الحزبية.. شوف تصريحاتهم بعدد أعضائهم الـ 400 ألف وقالوا حيوصلوا لرقم 3 ملايين تمام زي الوطني وأعداده الوهمية.. مش قلت لك نفس التكبر ونفس الفتونة ونفس الهيمنة الديكتاتورية.. واحد ينادي جماعته يتجمعوا من الميدان ويروحوا لمحاصرة النائب العام في قلعته القضائية.. وواحد ينفي وجود الجماعة في الميدان وكأننا شعب جاهل مش متابع تويتر أو النداءات العلنية.. واحد يقول نزول الاخوان للميدان كان خاطئ وواحد منهم برضه بيقول مفيش اخوان لكن دول ناس ارتدوا تيشيرتات الاخوان وانتحلوا شخصيتهم في يوم جمعة كشف الحساب الدموية.. واحد يقول أن الرئيس أحسن التصرف باقالة النائب العام وواحد يقول قرار الرئيس باعادة النائب العام قرار حكيم وعودة حميدة للشرعية.. واحد يقول هناك تسجيلات في الرئاسة لمكالمة النائب العام وموافقته على ترك منصبه وواحد يقول مفيش تسجيلات لأي مواطن في حديثه للمنظومة الرئاسية.. واحد يكشف عن قرب اعلان شبكة فساد رهيبة قريبا وليس له أي صفة ولا هو ينتمي لأي منظومة رقابية.. ونفس الشخص يقول على الرئيس السابق مش حيطلع من السجن الا على القبر رغم انه فيه نقض على الحكم في الدوائر القضائية.. تضارب التصريحات ومحاولة نفيها أو تجميلها هل هي عملية تجميل وللا حقن للتصريحات بجرعات سليكون تجميلية.. مش عارف هم مش مصدقين اللي هم فيه وللا مش مصدقين انهم بقوا أغلبية.. مش عارف عاوزين ايه تاني أغلبية برلمانية منحلة ووزارة ورئيس ايه ناقص تاني من منظومة الوطني الحزبية.. روح وشوف انتخابات حزب الحرية والعدالة وارجع بذاكرتك لمؤتمرات الوطني السنوية.. روح وشوف الهيصة والظيطة والبهرجة والتغطية الاعلامية.. اعلام وطني وأصبح اخواني وزيد زي عبيد والزمر والتطبيل والأمور زي ما هيّ.. هم في وادي والشعب في وادي والدليل الاصرار على طبخ الدستور على حسب الهوى بعيدا عن المطالب الشعبية.. ومسودة دستور كلها عوار وده شايفينه وحاسينه في تصريحات الناس اللي بتفهم في الشؤون القانونية.. روح وشوف كمان وشوف وهم النهضة مشروعهم الانتخابي وشوف أسعار السوق والحالة الاقتصادية.. بقينا نستورد غاز وسولار وبنعطيه هبة ورحمة ونور على أرواح شهدائنا لاخوانهم الحماسوية.. ورغم كل ده تلاقي تصريحات في تصريحات ووهم الشعب بأحلام وردية.. مش مهم محاولة تجميل التصريحات أو محاولة الهيمنة على الساحة السياسية.. فهناك شعب صاحي وواعي وعرف خلاص أساليب التحايل والمراوغات والشعارات الوهمية.. المهم الآن البعد عن محيط الرئيس وياريت يخلوه يتفرغ لمسؤولياته ووظيفته الرئاسية.. ياريت يبعدوا بتصريحاتهم دي عن شؤون الرئاسة ويتفرغوا لشؤون حزبهم وربنا يقدرهم على مواجهة كل القوى الوطنية.. خلاص الشعب فهم وفاق من وهم الشعارات وعرف مين اللي ضحك عليه ولهط ثورته التاريخية.. يوم الحساب مش بعيد واعادة التوازن لحياتنا أصبح قضية أساسية.. الحق قادم والحقيقة معاه وتأكيد شعار أنا لا أكذب ولكني أتجمل حقيقة واقعية.. اكذب كما يحلو لك وتجمل زي ما أنت عاوز ولو ضحكت على شوية ائتلافات مش ممكن ويستحيل حتقدر تضحك على شعب بهية.. وهي دي الخُلاصة وهيّ دي القضية..!!
[email protected]