|د. سعيد فهمي *|
نيابة عن كل مغترب من أرض المهروسة (المحروسة) أتقدم بخالص الحزن والأسى عن كل شعار اتعلمناه وعشقناه عمياني بغباء.. والحق مش على اللي علمنا لكن الحق علينا انه صدقنا ان فيه وطن بيخاف علينا وغصب عن عين أبونا لازم ندين له بالتبجيل والانتماء.. ونظرا لأننا على نيتنا وبنصدق كلام المسؤولين عننا واللي بيعاملونا احنا والبقرة الحلوب سواء بسواء.. السادة المسؤولين عننا كمغتربين نسوا أن المواطن المغترب المسكين بقى هو وأولاده زي البطة السودة مش مستاهلة اهتمام ولا مجهود وعناء.. حكومات متعاقبة ودايرة علينا داير مايدور وسواء كانت حكومة حزب وطني قديم أو حزب وطني متأسلم فالاثنين بيعاملونا زي الخرفان يدبحونا من غير حتى ما نقول مااااء.. وقلناها من زمان مش مهم احنا ولا مهم غربتنا المهم مستقبل ولادنا مايضيعش كده في الهوا هباء.. اللي حصل وبيحصل كل عام في مجزرة تنسيق الشهادات المعادلة دليل على البلطجة الحكومية واللامبالاه بأهم قطاع من المواطنين وصفاقة وبجاحة وافتراء.. الاصرار عل التضييق ومحاولة حرمان ولادنا من دخول الجامعات الحكومية واجبارهم لدخول الجامعات الخاصة قرار ظالم وغير دستوري ودليل على العنصرية والغباء.. التضييق على ولاد البطة السودة المعروفين بالمغتربين في دخولهم الجامعات الحكومية بيلغي من القلوب والعقول أي معنى للانتماء.. شعارات بنقراها عن الاهتمام بالمغتربين ولجان وهمية لبحث مشاكلهم ولجان وزارية وحوارات بيزنطية وقيادات بمختلف الأسماء.. مسؤولين عاملين زي البغبغان وقاعدين يعلمونا في الندوات والمدارس والكُتاب يعني ايه حُب الوطن وازاي تساعد بلدك بكلمات كتير وطنية وكمان متغمسة بحروف من الألف للياء.. حكومتنا منها لله عاوزانا مجرد جدار وانت هناك شغال في الغربة بتنحت في الصخر زي الحمار وتدفع ضرايبك وكمان جمارك خصوصياتك وتوفر مكان في وظيفة أو كرسي في مدرسة وتجيب عملة صعبة وترسلها وانت على نياتك بكل الحب والصفاء.. ناسيين ناس في الغربة بتموت مش لاقية ثمن الصندوق وسفارة بتستعبط وتمص دمنا بفلوس تصديقات وفلوسنا بتضيع هباء.. وناس بتمرض وتعاني من غير رفيق ولا حد حاسس بيها عايشين محرومين من كل المشاعر الا الظلم والحرمان والجفاء.. فيه ناس بتعيش من غير عمل وعمالة موسمية يوم فيه وعشرة مفيش والغربة مُرة أكيد وتعب وشقاء.. وناس بتغيب عن أهلها سنة بعد سنة مجبورة يا عيني من قلة مفيش أو تعنت كفيل أو معاملة غير آدمية والناس مضطرة للاستمرار وشايفة الغربة أرحم من وطنها وعلاج ودواء.. بعد كل العذاب ده ولو أمك داعية عليك وعندك ابن في الثانوية فعليه العوض ومنه العوض لأنه من غير أمل وعشم ابليس في الجنة يدخل جامعة حكومية حتى لو في أدغال سيناء.. لأننا كمغتربين بيعاملونا كمواطنين درجة رابعة زي المهجرين الفلاشا في دولة اسرائيل الصديقة حسب اتفاقية العار والغباء.. يبقى بعد كدة ييجي واحد ويقولك ما شربتش من نيلها أو ما دخلتش جامعاتها يبقى البعيد غبي زي كل مسؤول دبح أولادنا وحرمهم من مصريتهم وكأنهم والعياذ بالله أذى ووباء.. وتقوللي وطن يا أخي ملعون العنصرية على الحقد والغل على كل كلمة في القاموس بتدل على الانتماء.. !!
والسؤال دلوقتي للسادة السفراء اللي من المفروض بيمثلونا انتم ليه لسة قاعدين.. مدام ولادنا ولاد الجارية (الجالية) بتحرموهم وتحرمونا من كل حقوقهم وحقوقنا يبقى أنتم بتمثلوا مين.. هو يعني حفلات الاستقبال والاستهبال عمال على بطال هي اللي حتحل مشاكل المغتربين.. هو مين اللي مسؤول عننا وعن ولادنا واللي من المفروض ينقل شكوانا للراجل الكبير نيابة عن الغلابة المغتربين.. هي ليه حكومتنا بتفتح سفارات في كل البلاد وهي عارفة انها لا بتحل ولا بتربط في أي مشكلة لرعاياها المظلومين.. مين المسؤول عن ضياع أحلام أولادنا ومستقبلهم اللي اتنهب يرجع امتى وفين.. قالوا ثورة وقالوا عدل وطلع زيد زي عبيد وأحوالنا بتسوء من غير أي رد فعل من المسؤولين.. لما ابنك يجيب 98% ومايلاقيش كلية يبقى العيب فيهم وللا فينا علشان علمناهم وربيناهم وللا العيب في مين.. لما التنسيق يتأخر أسبوع ويبقى كله غلطات ومفيش محاسبة وكأننا رعايا بوركينا فاسو أو جزر القمر وكأن ولادنا للوطن مجرد منتسبين.. لو ابني سألني يعني ايه وطن ويعني ايه انتماء ويعني ايه حق ويعني ايه مواطنين.. يا ترى الاجابة حتكون ايه ومين حيبقى مسؤول سلطة فاسدة زالت وللا واحد مسؤول من المتأسلمين.. مش بيقولوا المصريين يد واحدة مسلمين ومسيحيين فياريت يضموا ليهم كمان الغلابة المغتربين.. يا تري نروح على سفاراتنا المصرية ونقدم طلب جنسية مصرية زي اخواننا الفلسطينيين.. مع ان حسب شهادات الميلاد ولادنا من أب وجد مصري وكمان من مصريات متجوزين.. يا عم رووووح واخبط دماغك في الحيط مدام كل المسؤولين بدون استثناء ودن من طين وودن من عجين.. بالذمة مسؤولين بالشكل ده ربنا ولاهم بالصدفة علينا وخانوا الأمانة وظلمونا يبقوا فعلا بني آدمين..!!
الخلاصة المغتربون في الأرض جزء أصيل من نسيج المجتمع مش قطيع بقر بتحلبوه وتمصمصوا عضمه وفي الآخر ترموه وكأنه زي خروف الضحية في العيد الكبير.. مفيش دولة بتحارب ولادها بالشكل ده ولا فيه مسؤول مهما كان من حقه حرمان ولادنا من حق الاختيار وتحديد المصير.. . أي مسؤول مش قادر على وظيفته ولا عارف دوره ايه لازم يتوكل على الله ويفارقنا غير مأسوف عليه من غير تأخير.. دم ولادنا في رقبتكم كلكم من غير استثناء وحقنا حيرجع حيرجع وده حكم العدل والسماء واللي فوق الكل الله الجبار القدير.. !! اللهم آميييين.. اللهم آمييييين..!!
[email protected]