نصيحة

نصيحة تحمل الكثير والكثير من المعاني السامية والهادفة محمد آل عمرة المري يصافحكم بهذه النصيحة:**

ياراشد العليا لها عشرة بنود

سجّل وأنا بملّيك واحفظ عددها

من شان ما يلحقك عيبٍ ومنقود

احفظ وصاتي والوصاة اعتمدها

أوصّيك قبل الجسم يدب به الدود

في حفرتن لابد نسكن لحدها

دنيا العنا فيها مشاريب وعدود

وكم واحدن له حاجتن ماوجدها

عليك بالتقوى ترا العمر محدود

واردع هوى النفس الدنيه وقدها

واحفظ صلاتك تكسب الرزق والفود

تكسب مكاسيب الحياه وسعدها

وصوم رمضان وزك يالشامخ الطود

ترا البيوت النايفه من عمدها

وجالس هل التوحيد والعز والجود

واترك مقاريد العباد وقردها

الي على التفريق ياتونك احشود

فصيلتن دب الجهل في جسدها

واحسن جوار الجار لو كان مقرود

لو جار نفسك لاتبين نكدها

والضيف عطه الطيب والطيب مردود

اكسب جناب الطيبين وسندها

عقب الشحم والبن قدمله العود

حيثك من الي من لفاها حمدها

وبنت الردي لو هي زلالن وقرهود

حذراك تقربها وتمسك بيدها

خذ بنت قرمن عند الاجواد محمود

لا جا نهار الهوش بين ولدها

وزلة رفيقك لالفت دون مقصود

لاتمسك الزله وهو ماقصدها

ثلاث مررها ولا شك بشهود

والرابعة شب الحطب لاوردها

هذي عشر وان كان تبغيني ازود

سجل على عشر الوصايا وزدها

الظلم شين وتالي الظلم مردود

والغيظ شيطان القلوب وكبدها

والصمت زينه والحكي سيف محدود

والحقد غيمه والتباغظ بردها

فكر وميز واعرف البيض والسود

واحذر قلوب الحاسدين وحسدها

يابوك بين الناس طارد ومطرود

ماتجهلك بعض الحرار وهددها

وان ضامتك دنياك واصبحت مضهود

فاطلب من المولى يحلل اعقدها

الواحد الي كلبينا له اسجود

الي جميع اعمال خلقه رصدها

هذي نصيحه وانت معطيني اوعود

واهل الوفى والعرف توفي وعدها

قدمتها بالمسك والطيب والعود

زرعتها لك زرع وانت اتحصدها

حميتها من دون ملحن وبارود

خوفن عليها المنتقد ينتقدها

وختامها العليا لها اشروط وبنود 

يالي تبا العليا تمعن وعدها

  

شعر: محمد آل عمرة المري