دار اخو مريم

ممدوح التويجري الحربي شاعر من الشعراء المميزين والذين يشار لهم بالبنان متمكن من شعره ويمتاز بقوة المعنى والمفردة، قال هذه القصيدة بمناسبة **العشاء المقام على شرف شيوخ ووجهاء واعيان القبايل الذين قاموا بالسعي لدى قبيلة حرب باعتاق رقبة ابراهيم الدريويش العازمي وتم هذا الأمر بفضل الله العلي القدير ثم بفضل الساعين وكان النائب السابق في مجلس الأمة العم الفاضل والشيخ راشد عوض الجويسري هو من جمع شيوخ القبايل ووقف موقفاً مشرفاً وسعى بكل ما يملك وليس غريبا هذا الأمر على ابو عوض جعله الله في ميزان حسناته فكان للتويجري هذه القصيدة في الجويسري ومن قاموا معه بالجاهية :



الله على اللي لاسرى تقل ممشاه

من صدر ركابه يزيل البهاذيل

جيب قبل يومين عدل مراياه

ماياصل العداد في مشيه الميل

لو ابعدد كيف بحصي مزاياه

يحتاج مني شرح وافي وتفصيل

لكزس جديد يسر بالك مراعاه

لونه مثل لون السما باول الليل

لله در اللي تفنن وخلاه

يبجل بجزلات الاشعار تبجيل

من القصيم عصير فلل وعباه

راعيه ناوي دار ربع مشاكيل

من دار اخو نوره تحرك ومنصاه

دار اخو مريم ياعسى داره السيل

دار لها التاريخ سطر ثناياه

مواقف للطيب جيل ورى جيل

واليوم تحت اظلال شيخ تولاه

صباح حلال العقد والغرابيل

حاكم يحب الشعب والشعب يبغاه

جوده يحير عقل الانسان ويهيل

تشهد له شعوب البسيطة بمسعاه

طيبه مثل صرف الدوى للمعاليل

الله يحفظه طال عمره ويحماه

ويجنبه شر الزمن والمحابيل

قلته وانا من دار شيخ عطيناه

صدق الولى اللي مايجي فيه تبديل

حاكم تشوف الخير كاسي محياه

وجهه توشح بالرضى والتهاليل

عبدالله اللي للمحبين ماحلاه

وعلى العدا تسليط من رب جبريل

داره ملاذ اللي شكى جور دنياه

وفعله يثبت له مواضيع ويزيل

يارب من سو المقادير تاقاه

وتجنبه خبث القلوب المغاليل

جينا الكويت بدعوة ماسهجناه

كريمة من عند ناس حلاحيل

سلام ياللي كل ماحل طرياه

صيته تعدى شهرة الجدي وسهيل

يالعازمي ياشيخ قوم عرفناه

بالطيب والفزعات بين الرياجيل

الجويسري منصى رياجيل تنخاه

ما حط دون اللي يجيله عراقيل

من روس ربعه والعوازم من اتلاه

قوم من الفزعات يقصر بها القيل

بني عطا اللي توصل العلم لاقصاه

من فعلها تجف الاقلام وتسيل

تاريخهم بالطيب مبطي قريناه

يوم القنا والرمح والجيش والخيل

يشهد لهم قاص المخاليق وادناه

قوم ترجح بالفعول المكاييل

العام يوم ان القدر حل بقضاه

والناس فزعها الطنب والولاويل

هذا بكى هذا وهذا دفناه

وحل العسر عقب السعه والتساهيل

اللي حصل مكتوب والامر لله

والادمي ماله بالاقدار تعديل

جتنا العوازم تطلب العفو بالجاه

معهم شيوخ تنطح الحمل وتشيل

شيخان قوم قدرهم ماجهلناه

اعمهم من دون ذكر التفاصيل

وقاموا مشايخ حرب كل بمسعاه

على هدف واحد تسوق المراسيل

للاحمدي يوم الامر ملك يمناه

بعد الولي بيديه كل المحاصيل

وتجمعوا روس العرب وسط مبناه

يمشي بمقدم جمعهم وافي الكيل

عبدالعزيز ابن سعد حي مجناه

ابن سعود منكل اعداه تنكيل

والاحمدي عطا العرب والله اعطاه

جمالة تبقى ولايمكن تزيل

الله يعوضه بالمثوبة ويجزاه

اللي مسح دمع العيون الهماليل

ربعي ليا من عد كل سواياه

لي لابة يرقى لها المجد ويكيل

حرب المعزه والوفا والمثاراه

والدين والنوماس والطيب والويل

حتى الدول يوم الحرايب حربناه

منا انكفت بجيوشها والاساطيل

اللي بقى بديار ربعي اسرناه

واللي رحل ماعاد باقي به الحيل

لو وادي الصفرا تكلم عطاناه

علم يسجل بالبطولات تسجيل

واليوم من فضل الولي لاعدمناه

في ظل حكم حول الوضع تحويل

عشنا رخى من جود ربي ومداه

اخوان نفرح باللقا والمواصيل

واكبر دليل الجمع هذا وما جاه

ولاودي ازود بالابيات واطيل

سلام ياشيخ دعانا وجيناه

وسلام يا جمع الرجال المشاكيل

  

شعر : ممدوح التويجري الحربي