أوراق شاعر...!
1 يناير 1970
02:41 م
... نايف الرشيدي، الشاعر المميز والجميل والمعد الشعبي الناجح بامتياز، وباقة من اوراقه الخضراء النابضة بالشعر ورقة المشاعر.
نايف الرشيدي...، وابياته وجمال حرفه بين ايديكم قلبوا اوراقه كيفما شئتم، فلا فواصل بينكم وبين الشعر والبنفسج...!**
«حساب الزميل الشاعر نايف الرشيدي على تويتر هو: naifalrashidi@.
قالوا: !
بيني وبينه لو تقولون خلاك
عشرة عمر ماهزها هرج تافه
لو تنشدونه من ورى الحب: وش جاك
كان امتلت عينه بدمع اعترافه
هذا حبيبي لو يدورن الافلاك
وانا ربيعه لو يخونه جفافه
ان سولفوا بي صد ذولا... وذولاك
خلا هروج اهل النميمة خلافه
دايم مساعدني على درب الاشواك
وانا كفيته عن دروب الحسافة
الله عطاه من الغلا فوق الإدراك
والله عطاني منه صدق التفافه
قالوا: تحريته وهو ما تحراك
قلت: احتراني لين ما العمر طافه
قالوا: شطب رقمك على شان ينساك
قلت: اكتفيت بضيقته يوم شافه
ياصاحبي لافاح صدري بطرياك
أشعلت لك بحر الحنين وضفافه
ماني مصدقها معاذير فرقاك
قصة فراقك شي مثل الخرافة
قبل امس تمدحني وبيضا نواياك
واليوم طاح الود واهتز قافه
أحبه... وأحبه... وأحبه!!
دخيلك لاتنسيني عيوني ما تبي تنساه
انا با أذكره لوبكرة تناستني مشاويره
أحبه كثر ما قلت القصيد بغيبته وابكاه
وانا مابي بالهدنيا حبيب مترف غيره
أحبه كثر مالج الحشا حزن على فرقاه
احبه كثر ماذب الغلا واقفى بتقديره
أحبه كثر ما ضم الورق في غفوته وادفاه
أحبه كثر ما يمسي على لجة تفاكيره
احبه كثر ضحكات البها في غرته وشفاه
احبه كثر ما تهل المشاعر في تعابيره
احبه كثر ما يشره كثر غيضه كثر نجواه
كثر ما يقبل بهمه كثر ما تاخذه حيره
احبه كثر ما مات الخفوق بضحكته واحياه
احبه وان كذب صوته صدوقه يا معاذيره
احبه كثر ما يتعب كثر ماتزعله دنياه
احبه كثر ما بل المحاني في مساييره
ما هو بيده يفارقني ولا كان الفراق مناه
مشي عاجل وانا داري تواصت به مقاديره
ما جاه من الزمن يكفي وانا والله عرفت اقصاه
عزاي انه قبل يمشي عرف ذنبه وتقصيره
فديتك لا تنسيني جروحي ما نست طرياه
عسى حب قصر دون الغلا ما تلحقه خيره
أكليلها
يالله... يالله تخلي لي محبتها
وتهون الجرح في قلبي وترعاها
وتخفف احزان دنياها ولوعتها
وتثبت الناس لاتخطي وتبلاها
يا مفرج الضيق ريحها بنومتها
اليا اشغلتها عن المرقاد بلواها
جملها بالصبر والنسيان واسكتها
يامبدل الحال شوف الدمع يغشاها
من عقب ما تشغل الدنيا بضحكتها
اليوم ما مرت الضحكة على شفاها
حسيت انا بصوتها واسباب ضيقتها
من قبل لا تقول وعيوني تباكاها
قال الزمن كلمته ما سمع كلمتها
ما عبر احلامها مع من تمناها
يوم اغصبوها ولاصانوا كرامتها
توجهت للكريم وقالت داعاها
صدت وبعيونها ياكبر شرهتها
واقفت مهي مصدقة طعنات دنياها
والطاري اللي تسبب في نهايتها
يوم ذكرت من يموت بليل فرقاها
هذاك من تفرح عيونه بجيتها
هذاك من يكتم الضيقات لرضاها
ضاقت عليه الدروب وباس صورتها
ما عنده اغلى من الصورة وذكراها
هذاك انا... واكرهك يايوم ملكتها
مجنونها ما عرف من وين يلقاها
وشلون ابصبر على ضيّان زينتها
وشلون امر بيتها من غير ما القاها
لا لولشن مترفات البيض حزتها
هذيك تضحك وذي ترقص وتنصاها
وخواتها يلفحن في ليل دمعتها
ما كنهن عايشن ما صار وياها
الموت يا أكيليلها وورود كوشتها
بالذات لاحطت المسكة بيمناها
والا المصيبة ليا قاموا بزفتها
وراحت معه والجروح الخضر بحشاها
للغلا مينا
لو للغلا مينا... عيوني مواني
لك يا بعد عمري القصايد ومغليك
ليتك بعد مارحت رديت ثاني
وتشوفني وشلون اسولف واغنيك
تجمعت كل الهموم بمكاني
وحسيت في جمر الزعل من تجافيك
وين انت رايح؟ لا تروح بزماني
اصبر قبل لاتذبح الحب بياديك
اصبر فديتك لو دقايق عشاني
على الاقل عطني ثواني احاكيك
يمكن تحس بضيقتي يوم اعاني
وترد لي بعض الامل في تلاقيك
يومك جفيت وكل شي جفاني
من ليلة البارح وقلبي يناديك