ملذات الحياة

جرت هذه المحاورة بين الشاعرين حامد زيد وناصر القحطاني وفيها من المعاني الشيء الكثير والمميز ولاهو غريب على نجمين في عالم الشعر الشعبي هذا الابداع والتميّز وجاء الشاعر ضيف الله بخيت المتعالي متأثراً بما جاء في هذه المحاورة من طرح وجاراهما بهذا النص الرائع والهادف.



نــــاصـــــر الــقــحــطــانــي

الله يا زين الليالي كل ما نرجع ورا

شان الزمن ياهل ترى والا يا عالم وش جرى

لا طعم للضحكة ولا اللقمة ولا حتى الكرى

والعمر ينقص مثل ما تنقص ملذات الحياة

ما فيه صدر الا وفاح ولا كلام الا انحكى

واللي شكا واللي بكى واللي على الحزن اتكا

واللي خذا له بندق ودور خصيمه وارتكى

حتى افلس وضاقت عليه الأرض من كل الجهات



حـــــامــــــد زيـــــــــــد

كلن يجود بنيته ولكل مؤمن مانوى

الكره داء بلا دوى. واصابعك ماهي سوى

النفس تتبع ماهوت والقلب يتبع ما هوى

وان قوّم الله القيامة نسأل الله الله الثبات

مايجرحك غير الصغير اللي يحسب انه عظيم

لاهو بشهم ولا كريم. ولا سراطٍ مستقيم

تعامله مثل الخوي ويعاملك مثل الخصيم

ان كانها من باب غيره ما يغار الا البنات



نــــاصـــــر الــقــحــطــانــي

إلا على طاري النسا... قل للنسا عل وعسى

تذكرون اللي نسى وتدلهون اللي قسى

وإلى تردى بعضنا.. تكفون يا جمع النسا

خلوا الغتر والثوب تكفيها الغطاوي والعباة

يمارس الهاوي هواه من المهد لين اللحد

حتى اكثر العالم جحد واصبح مااحد فاضي لاحد

من قدم السبت احسب انه دايما يلقى الأحد

لا واحلالاه سنتين من العصور الماضيات



حـــــامــــــد زيـــــــــــد

صحيح لي قال المثل ما كل شي(ن) بالفلوس

المال مايجمع نفوس ان عز روس يذل روس

من صار للدرهم قدر والناس تنداس وتدوس

جمع الرجال الاوفياء يغنيك عن جمع الفتات

اللي يحسب ان الرجوله فالشماغ وفي العقال

وبالضيق ماهو راس مال ولا يعد من الرجال

هذا اللي لي من ثورت في راسه الطلقة حلال

الموت خير من الحياة دام الحياء بالناس مات



نــــاصـــــر الــقــحــطــانــي

الفقر كرهنا بعضنا... والنبي منه استعاذ

وان ما لقى الطاير ملاذ... العمر تاليه النفاذ

إلى اجدبت كف العزيز ولا غشاها الا الرذاذ

قله عليك ان طعتني بالباقيات الصالحات

كن مبتسم واحذر يقال انه عبس والا بسر

حتى ولو جاك العسر... تلقى مع العسر اليسر

اجبر خواطر وانتبه ينقال خاطرك انكسر

وارسم حلومك في البياض مربعات مربعات



حـــــامــــــد زيـــــــــــد

ياكثر ما عبنا الزمن واثر الزمن مافيه عيب

إن عشت ذيب ومت ذيب. وكل فعلك فعل طيب

خذها نصيحه من مجرب قبل لا تسأل طبيب

اذا عيون الناس باتت عين ربك ما تبات

الله عطاك الموهبه والله كريم اليا وهب

لو حكيهم يشعل لهب. وقلامهم توزن ذهب

ماتبت ايدين النبي تبت يدين ابو لهب

اللي جمع شتاتهم يقدر يرجعهم شتات



نــــاصـــــر الــقــحــطــانــي

من هم بصعود الدرج لا يلتفت للي هرج

يصبر و لوحظه عرج.. والصبر مفتاح الفرج

وإن حس في صدره حرج والهم طول ما خرج

يجلس مع نفسه دقايق فوق سجادة صلاة

افتح عيونك للحياة أكثر وناظر في علو

لو عنك احبابك سلو و اعداك في كرهك غلو

والله لو تصنع من الليمون مشروب حلو

كان اكتشفت الوجه الأجمل للمحن والنايبات



حـــــامــــــد زيـــــــــــد

حتى ولو تقدر تبوق الكحل من فوق الرموش

وتجري مثل جري الوحوش. وغير رزقك ما تحوش

يعني بلا توفيق ربك لا تهوش ولا تنوش

يالادمي مافات فات مات وكل ما هو آت. آت

وان صابك من النايبات المعضلة خطب (ن) جلل

وجتاحتك موجة ملل. واغرورقت عينك بلل

يا عل كتف الصاحب اللي ما يشيلك للشلل

ولا بارك الله بالرفيق اللي يسوي هالسوات



نــــاصـــــر الــقــحــطــانــي

شف كيف مقدار النصيحة في القديم من الزمن

كل إلى قالوا تمن.. قال أشري وصاه بثمن

واليوم الآباء خل الابناء نصفهم ما ينضمن

وجدي على لقمان والا يا وجودي يا بركات

تشكي مشاعرنا الجفاف وكل صدر فيه خوف

أزمة ثقة وأزمة ظروف.. الكل منها ما يشوف

من كثر فقدان الثقة ما عاد يرجون الضعوف

من بيت مال المسلمين اي صدقة واي زكاة



حـــــامــــــد زيـــــــــــد

من عزه الله في ذرانا ذي فراش وذي غطا

نعطي ولا نرجي العطا. ولا يجي منا الخطا

نصبر على مر الليالي لو يطول ابنا البطا

بعض الاوادم لو يموت من الفقر ماقال هات

ما يجتمع كفٍ جواد ومدةٍ متباهيه

خل الاوادم لاهيه.. واعط العطايا راهيه

ياتكرم الناس بشرفها.. يا تغور بداهيه

لو صدق لك نيه تجود تجود لكن من سكات



مجاراة الشاعر ضيف الله المتعالي بهذه القصيدة الرائعة

ناصر وحامد في ملذات الحياة الفانية

قالوا قصيدة وافية طرق ورسالة سامية

كذا الشعر ماهو مجرد وزن والا قافية

فيه الهدى والموعظة والنصح خير من السكات

يوجّه الشاعر رسالة شعر سامية الهدف

رامي فكر ماهو صدف والرامي يصيب الهدف

والرايح الغادي لعل اما نكف والا هدف

مايعلم الانسان وش غيب الليال المقبلات

واللي يدور للدغل ويجيك في كره وغل

من خيبة احلامه نغل لوهو مع اعداك اشتغل

النصر معقود بنواصي الخيل ياراعي البغل

كم معجزات حققت على ظهور الصافنات

لله در اللي ترفع عن سفاهة واجتهد

في هذه الدنيا زهد ولا بغير الحق شهد

هرجة مثل طعم الشهد عدوه مثل عدو الفهد

ما جالس أصحاب الوشاية لاحقين القافيات

الرفقة اللي تلحق الرجال عيب ومنقصة

درب الوصل لا يحرصه كلن طريقه يبخصه

اصحب رجالاً في الرخا والا الشدايد مخلصة

برقابها سدادةً دونك نهار المكربات

خَل ْعزمك بربك قوي دامك على الدرب السوي

وان عشت وحدك منطوي لا تقول ماعندك خوي

اصنع لنفسك بالثقة والصبر دافع معنوي

وتكفيك صحبة متصف باجل الاسمى والصفات

لا صار قبل الاجنبي ذا الوقت يعداك الرفيق

وش عاد ترجي بالصديق لكن لا تخطي الطريق

الناس مثلك كل واحد عايش بهمه غريق

غير اغتنم زهرة شبابك من قبل وقت الفوات

ياصاحبي تجري بما لا تشتهي السفن الرياح

لكن حي على الفلاح ان شفت عدوان النجاح

القافلة تمشي ولا عند الكلاب الا النباح

والمجد ما ناله سوى راعي اليدين الطايلات

ياكم من احلام يصادرها في المهد الفقر

يكاد يقصر بالعمر ويسابق صروف القدر

لا مرني ليته يقابلني على هيئة بشر

وأريّح الاجواد من بلواه واحرمه الحياة

كم عذب الاجواد كم قصّر هقاوي من هقا

من خذ معه لحظة لقا يقلب له الدنيا شقا

منهو يحدّر به قبيح الوجه يبطي مارقا

يهد مقدار ابيض الوجه ويعرضه الشمات