أوراق شاعر...! / سعد الحريص: عندما يكون الشعر أكثر اهمية...!

اوراق مميزة للشاعر المميز جدا، سعد الحريص، وفضاء غارق بالشعر والمشاعر المتفردة جدا، لسعد جوه الخاص ونكهته الخاصة جدا، وحضوره المميز والصعب والجميل.

هنا رحلة اكثر جمالا عندما يصبح الشعر اكثر اهمية...



العذر

العذر مكتوب لاصر الخطا مقري

اسف على ضحكتي اسف على احزاني

خطاي معذور والا غلطتي عذري

ومرارة العذر في قلبي وبلساني

مدري وش اللي ذكرته وضاق به صدري

مدري وش اللي نسيت ولا تناساني

لبست انا ثوب لاطولي ولا قصري

يا طيبة القلب... وين القلب وداني؟

سنتين من عمرها مرت ومن عمري

سنتين احس الزمن فيها تعداني

سنتين مرت حياتي من ورا ظهري

والحب سجني ومسجوني وسجاني

والشعر مطرود من قلبي ومن فكري

سنتين ماني بأنا ماني بحد ثاني

غنيت للناس والدنيا على خبري

والشعر في دفتري مغرور وانساني

غنيت للحب يوم عيونها تغري

يوم الوفا والكلام الطيب الحاني

غنيت للدمع يوم ان البكا كبري

واليوم انا اكبر من دموعي وحرماني

اليوم ما عاد يمدي اللي جرح يبري

مليت من كثرة خطاياهم وغفراني

مليت انا الشعر مل الشعر من شعري

مليت انا الحب مل الحب وجداني

ليه انكسر بالعيون اللي تبي كسري

ليه اتغرب ورا حزني وكتماني

العين ما تستحي والوجه ما يذري

ما عاد يجزي هل المعروف باخساني

لو هي عليه عزيز النفس من صغري

ما اشاور القلب في كرهي لعدواني

ان رحت باكثرهم وان حيت باكثري

ضاقت بي عيونهم لو كنا وحداني

تعبت وازريت... ما مليت من صبري

ليت الذي راح مني كثر ما جاني

احيان ودي اطيح من التعب وازري

وتشيلني عزتي وسلوم جداني



هذا طريق

هذا طريقي واعرف انه طريقك وجيت

وانتي بعيدة وانا عودت قبل السلام

لو التعب في طريقك كثر ماني مشيت

ما رحت راجيك لو جيتك ومالي مرام

لو ما دريتي انا كيفيني اني دريت

احيان ما يشعر القايل بطعم الكلام

لك مني انساك وانهيها وانا ما بديت

ما احد يشيل بعيونه نور يم الظلام

كان الجفا جرح بيشيب الزمن ما شفيت

ما طاب جرحي ولو مني يطيب الغرام

كان الجفا صح ما اخطيتي وانا ما خطيت

ما هو بسلم العرب عيبه ولا هو حرام

كاني لقيت بعيون الليل دمع وبكيت

مصيري القى ورى حبك عيوني وانام



وحيد انا

وحيد انا في الطريق اللي يغربني

وحيد حتى من النسيان وظلالي

يابنت وش لي بقرب ما يقربني

القرب قرب القلوب وبعدي اشوالي

الصمت موحش وانا شاعر ويرعبني

والصمت مثل الوطا ما هو بمنرالي

انا ابتدعت الكلام اللي يعذبني

ولونت ضحك القلوب بلون غربالي

وانا لبست السكوت اللي يناسبني

وجها الكلام وسكت في عيون عذالي

دام الغياب افغيابي ما يغربني

عنك وانا ازريت لا غيبك عن بالي

تركت خلفي قلوب الناس ترقبني

تركت انا كل شي وجيتك لحالي



هبت جنوب

هبت جنوب وطاح برد المكاتيب

وياكثر ماهب الجنوب وذكرته

يملي حضوري من حضوره وانا أغيب

وياما غيابي في غيابه حضرته

ان جاء مطر صارت له ضلوعي شعيب

وان راح ريح طير اللي بذرته

جنبت لو مالي عن الدمع تجنيب

من وين ماهج بجروحي شعرته

واصمتي اللي صار بعيونه عيب

واجرحي اللي لو فضحني سترته

لي صاحب يملي كفوفه تراحيب

لولا الحيا من ضحكته ما عتبرته

وياصاحبي ما هي عليّ مقاضيب

عذروبي انك ذخري اللي ذخرته

عذروني انك شوهتك الاكاذيب

عذروبي انك جاك طيب ونكرته

ان جيتني بفراق زود العذرايب

اجيك انا من زود صبر صبرته

للطير جنحان وريش ومخاليب

لكن يضيع صيدته في غبرته

من جزم نفسي يوم... صار الردى طيب

حلمي قبل لا يكسرونه كسرته

ومن راح مني قلت ياعله مصيب

دورت له عذر كريم وعذرته

للي يبي بعدي انا ماني قريب

هو ما ربحني والا انا ما خسرته

قلبي حويي ما لقلبي معازيب

اللي حقرني من رداه احتقرته

رغم الجروح اللي بقلبي معاطيب

حبيت كفين الزمان وشكرته