بومشاهد ع الخط

• هيا هيا هيا اسبانيا.
- بومشاهد: ههههههه شيسالفة الكويت كلها فجأة صارت أتشجع أسبانيا، أنت قبل يومين كنت تحب ألمانيا مسرع ما قلبت.
• ههههههاي ليش ما تعرف الكويتيين يمشون على الموضة حتى في التشجيع... صدقني أنا أعرف ناس شكذر والله ما كانت تعرف حتى لون فنايل هولندا، والحين أسكت متعصبين ومسوين نفسهم فاهمين بتاريخ الكرة الهولندية، واللي أقولك أنا كنت متوقع يتأهلون النهائي، وأنا ميت ميت من الضحك عليهم.
- بومشاهد: لا الضحك مو جذي لو على الرياييل مو مشكلة... الحين حتى البنات دشوا باللعبة وكل وحدة تقولك أنا من زمان وأنا أشجع ايطاليا أو الارجنتين أو انكلترا ولو تسألها عن لاعب واحد بس تقولك ما دري، أنا أشوف اخواني والعالم يحبون منتخب أقوم وأقلدهم.
• الكويت تحولت كلها مدربين وخبراء ومحللين في الدواوين والقهاوي وتنظير شيء مو طبيعي، ويا ويلك لو ناقشت واحد منهم يفضحك فضيحة وسط العالم، وهو ثور والله ما يدري وين الله قاطه.
• خلك من السوالف هذى وقول أشرايك بتوقعات أخوك من أول البطولة وأنا أحذر من هولندا ليما أصدقت التوقعات بس أسبانيا بصراحة ما توقعتها تتأهل مع أنهم أفضل منتخب في العالم، بس ما دري ليش ما كنت حاسب احسابهم، ويستاهلون البطولة بكل جدارة.
أشدعوا أنت الاخطبوط بول الالماني.
- بومشاهد: أخوك أفصل من بول هذا عشرين واحد أفا عليك.
• تصدق محد توقع أسوونها الثيران، لان الالمان كانوا مرعبين في البطولة... بس كلا من مدربهم لوف قعد أخرعهم من لاعبين أسبانيا قبل المباراة، والكل لاحظ أن لاعبي ألمانيا كانوا خايفين حيل ورادين ورا بشكل موطبيعي، حتى هجماتهم كانت غير بالمرة عن مباراة الارجنتين وأنكلترا.
- بومشاهد: يا الثوووور... هذا الثور الاسباني لى دش الحلبة محد يقدر له، بس الحق ينقال أسبانيا وهولندا يستاهلون النهائي وراح تشوف أحلى نهائي بالتاريخ لان أسلوبهم باللعب روعة وخلنا نشوف بطل جديد بس ما دري ليش الكويتيين متعاطفين مع هولندا أكثر.
• لانهم أحبون أغنية «البرتقالة» هههههههههاااي.
- بومشاهد: ههههههههاي حلوه والله حلوه مع أنك من أول البطولة وأنت دمك ثقيل وغثيث يلا باي حبيبي.