| د. سعيد فهمي * |
زمان قالوا في الأمثال «ان كبر ابنك خاوِيه».. وان وقع في الغلط حاول تعلمه وتهدِيه.. وان اتعرض لأي مشكلة اجري عليه وحاوطه بين ضلوعك واحميه.. وان كان له رأي تاني ياريت توسع صَدرك وتستوعبه وتناقشه فيه.. وازرع جواه الفضيلة والشجاعة ويقول رأيه بصراحة يعني بلاش يخفيه.. وبلاش تحجر على رأيه وناقشه وان كان رأيه سليم من غير مكابرة استفيد منه وحاول تعمل بيه.. الخلاصة هو ده المفروض واللي لازم يحصل وهو ده المناخ اللي لازم نعيش فيه.. الرأي الآخر مش تطاول أو خيانة ولا عيب نخجل منه ونداريه.. وده اللي مفروض نمارسه في حياتنا العادية فما بالك بوطن عايشين جواه وساكنين أراضيه.. من غير مزايدة الوطن شركة مساهمة بنشترك في تأسيسها كلنا وكل واحد من وجهة نظره بيبني طوبة علشان يكبره ويعليه.. باختصار الوطن ده مش ملكية خاصة لأي فرد عاوزه ملكه لوحده ومن غير حساب يقعد يبرطع فيه.. الرأي للجميع شعار المستقبل لازم نحافظ عليه والأهم من ده كله نؤمن بيه.. ومش كل من كتب رأيه يبقى صاحب بلبلة ولا كل مسؤول معاه مفتاح سُلطة يعمل نفسه رقيب ويتحكم فينا وفِيه.. اللي على راسه بطحة يحسس عليها واللي خايف من النقد والحساب بلاش يشوشر على رأي غيره ويداريه.. الرأي الحر دواء لمشاكلنا لكن ياترى اللي بيوشوش في الودان ويصنف الناس بمزاجه مين يقدر يداويه..!!
وده كان رأي عبدالسلام جاد الحق أمين.. اللي كان غاوي يعبًر عن كلامه وهمومه في صورة حروف متشبكة ويبعتها للجرانين.. وكان بيكتب عن أحداث حقيقية وحاجات بتسبب للناس وجع وأنين.. وكان كلامه علشان الوطن لا حزب ولا شخص بذاته مهما كان مين.. ولا عمره فبرك كلمة ولا طبل لمسؤول ولا قال لغير الله آميييين.. عبدالسلام كان فاكر ان البلد بتاعتنا كلنا ولا كان داري ان فيه عيون بترصد اللي بأحوال بلدهم مهتمين.. وكان بيقول رأيه وينقل للناس نبض الأحداث وبيضرب الجرس يمكن يفوقوا لما يسمعوا الرنين.. ياعيني عليك يا عبدالسلام انت مش عارف ان فيه ناس من مصلحتها يبقى الناس نايمين.. انت اتجننت ياعبدالسلام انت مش عارف بتتكلم عن مين.. ورغم ان عبدالسلام كان راجل مسالم ولا له تطلعات سياسية ولا حزبية ولا له في الطور ولا في الطحين.. مجرد سارد لأحداث حقيقية من أرض الواقع من غير تلوين.. وعمره ما هاجم بلده ولا كتب عنها أي خبر كاذب ومشين.. لكن تعمل ايه بقى في أصحاب صكوك الغفران اللي بيوزعوا الألقاب بمزاجهم وحسب مصالحهم على أي صاحب رأي فطين.. والغريبة يصنفوا الناس ده شيوعي وده اخوانجي وده بتاع مشاكل وده من الناس بتوع أبجد هوز الوحشين.. ياترى مين اللي بيصنف الناس حسب مزاجه ومين اللي بيحدد مواصفات الخاين والأمين.. وياترى المقاييس دي صالحة لعصر معين ولا كانت موجودة من أيام حكم الفاطميين.. وياترى الناس اللي بتكتب التقارير في عبدالسلام أو غيره غير مرئية ولا زي البني آدمين.. هي البلد دي بتاعتنا كلنا ولينا حق فيها ولا بتاعة مين.. وعلشان تقول رأيك وتعبّر عن همك تــبقى مرصود ومحسوب من المعارضين.. ياترى ياعبدالسلام علشان بعبعة كلام تبقى خلاص من الشياطين.. هو مين بيحكم الأمور ومين اللي بيصنف الناس ومين اللي عاوز الكل يقول آميين.. مين اللي عاوز الناس تطبل وتزمر وترفع أيديها وتقول موافقين.. واللي عاوز الساحة تبقى فاضية لأصحاب المنافع والسطوة والسادة المحتكرين.. مين اللي بيتمنى يخنق كل صوت ويداري عن تجاوزات وأخطاء المسؤولين.. عبدالسلام سأل جواه هو احنا مش شركاء في البلد ولا احنا جايين من بره مستوردين.. صكوك الغفران أمانة عظيمة لكن ياخسارة اللي بيوزعها مين.. عبدالسلام اتلسع من نار الأرزقية بتوع حُب الوطن واللي عاملين وطنيين.. وشاف دعوى وزير المالية على واحد من أصحاب الرأي المتميزين.. علشان بينصح الناس يقاوموا ظلم الضريبة العقارية وسطوة الجباية على المواطنين.. رغم ان الكبير وعد بمراجعتها وانصاف المظلومين.. وأصدر قرار عفو عن صحفي قال عنه كلام كتير وكان فاكر انه زعيم الصحافيين.. هو ده كان رد فعل الكبير ليه بقى فذلكة أصحاب صكوك الغفران الظالمين..!!
عبدالسلام كان فاكر كلامه مالوش تأثير ولا بيهش ولا بينش.. أتاريه كان متراقب ياعيني من واحد مظفلط محفلط حاطط في مخه كرش.. وقاعد في الوزارات والسفارات للسقطة واللقطة يزور في التقارير ويغش.. واخد راحته عالآخر وليه لأ مدام هناك مسؤول فاتح ودانه وواحد نازل فيها يوش.. ياترى حتعمل ايه يا عبدالسلام حتكمل طريقك وتكتب خواطرك ولا تخاف وتكش.. الاختيار فعلا صعب لكن ان قلت قول الحق وبلاش نفاق أو غش.. ياترى يكمل الحدوتة عبدالسلام ولا يستسلم للأمر الواقع ويستكين ويبات في العش.. ويقاوم وساوس الخوف حتى لو نام عالأسفلت من غير غطا ولا فرش.. ياريت تسمع كلام عمك سعد اللي قال مفيش فايدة وروح وشوف لك سبوبة أو اكسب لك قرش.. وياريت تخليك في حالك واكتب في الموضة أو الكورة واتعشى كافيار بدل أكل المش.. بس المهم ربنا يكفيك شر موزع الصكوك صاحب الذمة الكاوتش..!!
حكاية عبدالسلام قصة حقيقية وواقعية.. وبتعبر عن حادثة حصلت بجد وأمور كتير مستخبية.. وصدقني طول ما صاحب الصكوك موجود حتفضل الدنيا زي ما هيه.. شفت بقى بذمتك الأمور ماشية ازاي ياترى بعد كده حتقول رأيك ولا حتخاف تلبس قضية.. حقيقي حاجة تفرِح ومنتهى الديموقراطية.. وتقولي تغيير ياعم رووووح احلم بعيد عننا وياريت تتعشى وتنام خفيف بس ياريتك تتغطى بالبطانية..!!
[email protected]