أوراق شاعر...! / علي بن صالح الطويرب: الزمن الجميل للشعر...

الشاعر القدير علي بن صالح الطويرب، شاعر فذ اشتهر في فترة الثمانينات بمجموعة كبيرة من قصائده المميزة، وغنى له العديد من المطربين الشعبيين، وربما العائق الوحيد لعدم انتشاره بشكل أكبر هو عدم اهتمامه بالإعلام، ولكنه اكتفى بترديد قصائده لمحبيه ومحبي شعره، وتناقلها الناس في ما بينهم، حتى تجاوزت حدود مدينته حائل ووصلت للجميع.

وهنا مجموعة من قصائد ذلك الشاعر الجميل:





«طيري غدى»



طيري غدى واقفى يرف الجناحين

طيري غدى يا حمود وقت الهدادي

وين انت يا طيري وينك وأنا وين

حرمتني ياطير نوم العبادي

وعدتني في جيتك بعد يومين

واليوم شهرين مضت بالعدادي

زرعت في قلبي ورود وبساتين

ومن العطش بين عليه السوادي

قالوا لي العذال انتا امسيكين

قلت اتركوا يامخربين البوادي

خلي حسين الدل سيد المزايين

ماشفت مثله في جميع البلادي





«دمعة الأحزان»



يالعين وشبه دمعك اليوم بيفيض

من فوق خدك أزرق الدمع فاضي

الراس شيب والشوارب غدت بيض

وعزي من مثلي من الهم قاضي

تصبري وانسي خطات العواريض

انسي وتناسي كل ما كان ماضي

هذي حياة اللي تولع مع البيض

يطري عليه اللي من البيض واضي

ناس عليه اتحرض الهرج تحريض

عدون للعشاق قلوبه امراضي

القلب يكفخ بين الأضلاع وينبض

نوض الخيال اللي من الغرب ناضي

على الذي علمي به العام بالقيض

اللي عليه القلب غنا وهاضي

يازين انا وياك محنا محاضيض

وظن انا وياك محنا احظاظي





البارحة



البارحة شافن على الشرق براق

خلته على الصمان تلعج بروقه

خلته ونا اللي للمقانيص مشتاق

عسى هما ليله تحقق حقوقه

بعد الغياب وبارقه يشرق اشراق

وراع الولع غصب يتحرك خفوقه

ساقه هواء القبلي هماليل وانساق

ومن بارقه اخيل يمه لعوقه

عسى السحاب اللي رفا القاع مدفاق

يسقي السهل اقصاه ويظفي فلوقه

في مزنه سيلة على الأرض دفاق

يسقي من العارض اللي حد لوقه

يسقي فياض به ملاوين الأوراق

يما الخمايل يزمي السيل فوقه

ويزها خضار الأرض من عقب مشراق

ويسقي هشيم يابسات عروقه

يابو محمد ماحلا نور الاشفاق

وشبيت نارك قبل مطلع شروقه

على اشهب ماحر جويه بالاسواق

من الوكالة منوة اللي يسوقه

والياطرا المسراء على الدو ينساق

مثل الشهاب اليا انصرم من شعوقه

هو منوة اللي عن هواء القلب منعاق

والياطراله صاحبه ما يعوقه

لو كان من دونه طويلات الافلاق

ياطا على عسر السهل مع اعروقه

وليا تهيالك مع الجيب لحاق

حر حمر صافي معالم ادقوقه

طلعه اكيد لبرق الريش دقاق

ولا هو لشيهان يقطع اسبوقه

نبي لنا مع طيحه الوسم مسراق

قبل يجف مرباع عمري اعروقه

مع شبة يطرب لهم كل عشاق

للبر تعجبك النشاما أبموقه

وليا اجتمع ربعي وربعك بالأذواق

كلن يقدم للمحاضير ذوقه

هذا يقدم لك من الزاد ما لاق

يقدم المقسوم من قبل ذوقه

وهذا يشوقك للسوالف اليا راق

يعكبك ياسلوبه ومزينة انطوقه

واحد يحب الصيد ورميه بالآفاق

ويفز لا شاف القطا مع فروقه

واحد يتمشى بالخلا وقت الاشفاق

يجيني الزبيدي بالرياض ويشوقه

واحد يخير جلسته وسط مشراق

حب المعاني ساري في عروقه

لا يا علي هزن علي الربع الاشواق

ولا خير بالدنياء تقطع فروقه

يا شوق من يزها جبينه بالأدقاق

بنت الشيوخ اللي زهن به دقوقه

اللي عليهم أشكي الصدر لا ضاق

واشكي لهم حالي وقله ووفوقه

هذا هو اللي محرق قلبي احراق

غديت مثل اللي تقطع وسوقه

وصلاة ربي عد ماهل دفاق

على النبي واعداد وابل حقوقه