صوت

باقي من الذكـرى رسـوم للأطـلال

هـوج الريـاح العاتيـه مامحتـهـا

أظنهـا تبقـى علـى مـر الاجيـال

تنبيـك عـن قـدرة يديـن بنتـهـا

أرض نشا فيها مـن الخلـق نـزال

وشخص عشقته عاش فـي ناحيتهـا

ان غبت عنها شفت من ضيقه البـال

مايلحـق النفـس العليلـه عنتـهـا

وان جيتها عقب التباطـي والامهـال

فرجلي تسير ايليـن تاصـل جهتهـا

واقف عليها وارسل الطرف يجتـال

والرجـل ماكـن البسيطـه تحتـهـا

تموج كنـي واقـف فـوق زلـزال

وعينـي تضيـق بعبـرة حابستهـا

اخاف يـدري بـي حسـود وعـذال

حيث العيون دموعها حابستهـا

ياشيخ واقلبي عليـه الصبـر طـال

وراحـت مسراتـه سريـع فوتـهـا

ياشيخ كلـن قـدر مايحتمـل شـال

ونا حمولـي كيـف نفسـي قوتهـا

نفسي لها عـن لـذة العيـش سـلال

تتقـوق لاخبـار القديـم وسنتـهـا

والا الغـرام بعشقـي طقـه الجـال

واصبـح جنـازه والسنيـن قبرتهـا

ولاعاد لي ملحوظ في الـواو والـدال

فلت يدي صفحه والاخـرى طوتهـا

واصبحت من عقب المخاطر والاهوال

اجنـب الحيـه واعـاف شجرتـهـا

ياميـر بينـت السبـب لـك ولازال

في النفس حاجه وانكفـت ماقضتهـا

يامير شخص ياصل الحبـل بحبـال

وشخص يسـره يـوم يقطـع بتتهـا

وانت العديم معـرب الجـد والخـال

ونفسـك مراقيـب الشهامـة علتهـا

خذهـا شهـادة واحـد مابعـد قـال

كلمـة نفـاق يرتـجـي منفعتـهـا

والناس يابوزيد مـن كـل الاشكـال

من شـاف عثـره عاثـر ماغمتهـا

الا الـذي ماللـرد فـيـه مـدخـال

هـذاك ابونفـس يحصـل بختـهـا

وقت مضى له حال واليوم لـه حـال

وارجى من المولى حسـن خاتمتهـا





شعر: عبدالله السلوم رحمه الله