أوراق شاعر...! / ثامر شبيب: ملامح عشق في ليلة رحيل...!

>أوراق أكثر اخـــضراراً، تــــضج بالشعر والسحر والعطر، لشاعر أكثر تميزاً وجمالاً.

ثامر شبيب أحد أجمل الأسماء في كتابة القصيدة الرومانسية وأحد الشعراء الذين يزرعون الجمال، في أوراقنا وأرواحنا.

هنا محاولة بسيطة لتقليب أوراق الجمال في خيال شاعر ينحاز للحب بكل أبجدياته...!





ولدي



لا ملامة لا تشره لا عتاب

ما غدا لك شي مفروض يغدي

لا تحاسبني على أسباب الغياب

في يدك ما صار ما كان بيدي

لو رجعنا وابتدينا بالحساب

منتهي وياك من قبل ابتدي

كنت اشوفك غير لين القلب ذاب

في هواك وصار ماهو بجسدي

وقتها لو لي ولد عمره شباب

يمكن احبك كثر حب ولدي

لكن اللي غاب... يوم النور غاب

شي يحداني عن ايدينك حدي

تذكر اللي صار يا مال الذهاب

ليلةٍ ما جيت وامسيت اوحدي

لا تغرك بسمتي وزين الثياب

داخلي ضايق من الوقت الردي

السؤال اللي بقى ماله جواب

ياكثر ما مر على الجرح الندي

يا معودني على طرد السراب

وشتبي فيني اليا ضاع جهدي؟

صرت أنا وياك نشبه للسحاب

لا تجمعنا تساقطنا بردي

السحاب اليا تساقط بالاهضاب

يحيي القاع الحزين الجرهدي

بس حنا... لا تساقطنا عذاب

نكسر القلب الكبير الاجودي





قلب بدوي



ما علي خلاف اقول اللي ابيه

من فضل ربي علي أني قوي

الا حبك شي ما اقدر عليه

كن حبك ضيف والقلب بدوي

انت بس اللي ابيه ولا اجيه

عنك حظي لاوي ذراعي لوي

صرت لي مشوار لاجيت ابتديه

ان لقيت الدرب ضيعت الخوي

رد يا منهو حياتي في يديه

لا تخليني وانا لك مهتوي

ان خسرتك وين ابلقالك شبيه

وانت من كل شي نادر تحتوي؟

وين رايح جعل هالزول افتديه

وانت خابرني من البعد انكوي

انت حتى الجرح منك اشتهيه

من غلاك اضمي عذابك وارتوي

انت لا سولفت ما كني هنيه

التزمت الصمت كني منطوي

ليه اسولف لك وهي من غير ليه

تعرف انك تطوي احزاني طوي

انت حبك شي ما أقدر عليه

كن حبك ضيف والقلب بدوي





حبيبي روووووح



حبيبي روح لا تقعد عشاني لا بغيت تروح

إذا ما عاد لك حاجة بوجودي لا تجاملني

عشاني... لا عشان الملح والعشرة ياروح الروح

إذا دمي ثقيل أصبح بعينك ما تحملني!!!

تخيّر بالدروب وكل دربٍ يعجبك مفتوح

وانا لا رحت عن عيني ابلقا اللي يوصلني

تعذر لا بلاش انك تعذر ابتعد مسموح

تراضيني سنين البعد كان البعد يزعلني

علي لا ينشغل بالك ولو كلي غديت جروح

تهملني ربع واحباب والله ما يهملني

ترى اصعب شي بالدنيا إذا صار الغلا مذبوح

بقلب اللي تحبه وعاملك باللي تعاملني

احبك شي... وشي ثاني خطاك ان قلت لك مدموح

تجاهلني وتبي ادمح خطاك انك تجاهلني؟

احبك لو على قلبي دلالك ترتكي وتفوح

هذاك اول زمانن فات قبل انك تبدلني

بحب اللي تحبه صرت تنطر شوفته مشفوح

انا ادري من عيونك تفضحك لوّك تظللني

اشوفه في عيونك... يا عيوني في سماك يلوح

اخذ نفس المكان اللي لجل يوصله نزلني

حبيبي روح لا تقعد عشاني لا بغيت تروح

انا ادري منت في حاجة وجودي لا تجاملني!!!





ليلة افراق



الليلة هذي واضحة ليلة افراق

حاولت اعديها وعيّت تعدي

اظروف ما تنطاق ولا راح تنطاق

صد القدر ماهو بصدك وصدي

تعال اخذني بين اياديك مشتاق

قبل انتفارق حط يدك بيدي

بجلس معك ساعة حبايب وعشاق

من بعدها كيفك ولو صرت ضدي

فيني خليط اشواق باشواق باشواق

واصل معك من كثرت الشوق حدي

ودي ألمك واحضنك حضنت عناق

ياشيب عيني كل ما قلت ودي

في خاطري.. وش خاطري؟ خاطري ضاق

الكون كله ضاق ماهو بقدي

حتى الدموع اللي استحت كبر واخلاق

تساقطت من فوق خدك وخدي

لوحة شعر تبكي على بيض الأوراق

بيّحت فيها من ردى الحظ سدي

ليلة جفا وافراق ما مثله افراق

حاولت اعديها وعيّت تعدي





محتاج لك حيل



محتاج لك حيل والله يقطع الحاجه

حدتني وجيت اداري دمعة عيوني

باين علي التعب والضيق وانتاجه

منهار لوني متغير ماهو بلوني

لقيتك... اللي يصد معقد حجاجه

وانت اقرب الناس والغالي ومضنوني

لكن على الله بديه الضيق وافراجه

ولا انت الله معك خابت بك ضنوني

بلاش منك ومن موقفك واحراجه

رح واتبع اللي خذوا مني وخلوني

من صد عني ترى ما نيب محتاجه

من دونه اعيش دامه عاش من دوني

وان قدر الله مع الأيام نتواجه

تمر مثلك مثل ناسن يمروني

في عيوني تصير ماتسوى ولا حاجه

من عقب ما كنت تسوى الناس في عيوني