بعض الهقاوي

جايز إني كنت غلطان وهواوي

جايز إني كنت لافكاري ضحية

جايز إني ما فعلت وكنت قاوي

واحترمت النفس عن بعض الأذية

حدني وقتي عليك وجيت ضاوي

شوق مادري ذوق مادري عنصرية

والمراجل ما تحققها المناوي

الوفا والطيب ساس المرجلية!

كم جرا.. كم طاف.. كم مرت بلاوي

كم قصيدة.. كم مصيبة.. كم قضية

ضرب جمع وطرح تقسيم ويساوي!

كلها لعيون من لا شفت زيه

والروايا ما كتبها غير راوي

يفهم المعنى وعنده مقدريه

وصح هذا الوقت ما يرحم وياوي

صح ما يرحم سوا رب البرية

كنت هاقي... «لعن أبو» بعض الهقاوي

تقتنع فيها وصدمتها قويه

ولا تخاوي كان تقدر... لا تخاوي

غير منهو يرخص الروح لخويه

وإنت يلي تسكن القلب الشقاوي

غير قلبي وين تلقا قابلية؟!

قابلية حب... وإخلاص... ورجاوي

واحترام.. وطيب قلب.. ومعنوية

وإن بغيت تصير مثل الذيب عاوي

يا سلام الله عليك وخذ تحية