بورصة والنعم

| شعر: نايف بندر|

ياشاعرٍ تفخر بمنطوق قولك

الشعر ماهو للرجاجيل مقياس

أفخر بدينك وافتخر في رسولك

واعتز بأخلاقك وطيبك مع الناس

لا تفتخر بأفعال ماهي فعولك

حتى ولو قلت إنك معرب الساس

الطيب ماهو بس عندك وحولك

الطيب مع كل المذاهب والأجناس

الشعر باب الصدر وأسمى قفولك

والعقل والحكمة للأفواه حراس

الواجب إنك قبل ترمي حمولك

تستأذن الضيقة بعد قرع الأجراس

لو تكتشف مرجان نفسك ولولك

أخير من طردك ورا كل هوجاس

لا تترك أحساسك رهينة فضولك

ولا تحبسه مابين نبضك والأنفاس

أطلق عنان البوح وأحذر نزولك

إن كنت من عشاق ما يرفع الراس

طيبك لحب الناس يضمن وصولك

والا الردا مافيه للرجل نوماس

ولاصار عز النفس ماهو ميولك

من بورصة (والنعم) تبشر بالافلاس

ياحادي الأوهام ريح ذلولك

قفا زمان السيف والدرع والطاس

لا تنخدع في شلة ٍصفقوا لك

وشلون شاعر وأنت ماعندك إحساس

سلم على شعرك وقافك عذولك

مادامت حدوده من حدود قرطاس