قالوا تغزل

قالوا تغزل قلت ماودي افصح
اخذت أنا من منهج الود راحة
ما عاد به قسمة ولا جمع أو طرح
معادلة فيها تضيع المساحة
من دون مدخل بالتفصيل واشرح
الأمر واضح ما يبيله فصاحة
اغوص في بحر الهوى كنت واسبح
واصك قاعة لين اصل محاحة
ما كنت اقيل لا ولا اهجع ولا امرح
في ما مضى ليا بغيت الصراحة
وليا نصحني عاذل قلتله رح
ماني بقبل العذل ولا النصاحة
راعي الهوى لا قلتله دونك افلح
من الغوى وجهه من النصح شاحة
مسكين طراد الهوى حيل يسمح
لو هو نقص حقه يجيبه سماحة
يهيم في شانه ويضوي ويسرح
رايح بفكره في مساه وصباحه
حياة مختلطة بها الجد والمزح
نوبن على جنبه ونوب انبطاحه:
يقنب بعض أيام وأيام «...»
مرن فرح وامرار تسمع مناحة
راع الهوى يطيح لا قتلته طح
متدودهن والعقل ناقص رجاحة
يخاف سره بين الادنين يفضح
يدري على سره يخالف انفضاحة
امثال قبله من زمانن على صح
هذا الهوى مهي برحلة سياحة
وللي يريد الدح يصبر على الاح:
يصبر ليا من لاهب الحب لاحة
بأسباب منهو لاحني بالهوى لح
مقدم وكتف وردف وايضاً ملاحة
متخالطة بالوانها وطبعها سمح
والصدر كنك جالس في براحة
منبوزة الارداف جبينها اوضح
مدري بياض الخد والا وضاحة
عذروبها فيها لراعي الهوى شح
بخلية بالوصل فيها شحاحة


فهد عثمان السعيد