من كثر حبي

|شعر: طلال فالح بن الرشيديه|
وينك حبيب الروح صرنا نحاتيك
وينك ترى قلبي وله لك ويهواك
شفني اغني تالي الليل مغليك
حتى وانا سهران عايش بذكراك
جالس وانا قلبي على الدوم يطريك
واذكر زمانٍ عاشه القلب وياك
احلى الليالي عشتها هي لياليك
عشت الوفى والطيب شفته بدنياك
يازين لا تبخل علينا ابمماشيك
كيف الخفوق ايعيش دنيا بلياك
فزيت تالي ليلي ومنشغل فيك
من كثر حبي لك وشوقي بلقياك
قلي وعطني عن علومك وانا اعطيك
قلي وطمن قلب ميّت بفرقاك
يازين مابه بالبشر من يساويك
مابه مثيلٍ يشبهك في حلاياك
قلبي تمسك بك ولا هو بناسيك
قلبن وله لك ومتولع ويهواك
تعال يا غالي وربي يحييك
و ريّح ضميرن بالهوى دوم يبغاك