سيوف الغدر

| شعر: وسمي العبيان |
بصيص من الامل يكفي اعيش الوقت وصدوفه
أواجه حظي العاثـر واعـدل ميلـت ايامـي
سنين من العمر قفت ابـد ماهـي بمخلوفـه
محال ان الزمن يقدر يغيـر مذهبـن سامـي
عزفت الناي من ظلم السنين وزانت اعزوفـه
مشيت الدرب والرمضا تحرق واطـي اقدامـي
شهاب الغيم تفرح به اراضـي فيـه ملهوفـه
سموم القيض ماترحم خفوق من العنا ضامـي
طموحي يعشق العليا ولو خانت بـه ظروفـه
مصير الوقت ينصفني عقب مانكس اعلامـي
شكيت الهم لحروف القصيد وتاهـت حروفـه
نويت اكتب معاناتـي ولكـن جفـت اقلامـي
نحيل الجسم والبسمه من الاحـزان مخطوفـه
يكل المتن من حمل الهموم وتصمد اعظامـي
رويت الخد من دمع العيون وبانـت جروفـه
لبسني الحزن من موت الفرح وانهارت احلامي
سبايب جرح في صدري قسم لو انك تشوفـه
تحس بحرقت الدمعه وتعـرف سبـت ألامـي
اشوف بهالزمن صارت سيوف الغدر مألوفـه
وسيف العدل مايملك يمينـن ضربهـا حامـي
مصيبه طعنت الغالي ولـو ماهـي بمكشوفـه
تموت وطعنته تبقا بصـدرك جرحهـا دامـي