عشق الشرف

|  شعر: خميس العازمي  |
ألا يابو خالد لي حوالي ثلاث شهور
وانا اشيل حبن كل مخلوق ما شاله
لو اني ضحكت وجيت في صورة المسرور
لا والله رفيقك تالي الوقت يرثاله
سبب من على بالي لو ان السنين تدور
لكن المصيبه كان ماني على باله
ترك عندي التفكير والخاطر المكسور
وقلبن لو انه ماعرف حبه اشواله
كتمت الغلا لكن فضح شكلي المستور
ووجهي كشف كل الخفايا من افعاله
ولا عدت اصدق من يقول الصدور اقبور
مادام الوجيه تفسر الحال واحواله
غرامن نبت فيني وساس الغرام اجذور
وقلبي على موسيقة الحب غناله
وشوقن ورى قضبان صدري رحاه ادور
ودلو الغلا بين المحاني صفق جاله
تنهدت بغيابه وصرخه بدون اشعور
وجريت صوتن شايب الحزن مواله
يقولون نصف الشعر كذب وخيال وزور
وانا اقول ابن سالم على حق لا قاله
ما قلته من اجل اصير شاعر ولي جمهور
سوى من غرامن عاتي الوقت ما زاله
ياعشق الشرف ما انت بتفاهه ولعب ابزور
بقلبن معه مايفتح اذنه لعذاله
ياليته مثل غيره ابالي يمر امرور
واحصل لعقدة حارق الشوق حلاله
وانا كل تفكيري اخاف الظروف تجور
واخاف الزمان ايحد من نعمة اوصاله
وانا الي على وصله تعبت وجبرت اكسور
وياكبر المصيبه كانها شدت ارحاله
ابو غيبتن معها جميع الحياة اتبور
ابو طلة تغني عن العيد وهلاله
علي بالحرام انه اذا غاب غاب النور
عن العمر وشهوره والايام ولياله
كان الفرح بيدينه المنهي المأمور
ولا شال جوالي سوى رقم جواله