جدا شقي

| شعر: غازي بن مشعل |
أغاثك الله يا نهر بيلدرا ليت
ما جيت في ضفه نهرك وتمنيت
بكيتك تسعة وتسعين عاشق
وأنا رقم سبعين وأكثرهم أبكيت
لو كنت تعلم ما يجوب ابضميري
ويكون لك قلب ومشاعر وحسيت
الينقلب مائك اجاج وملوحة
وتقوللي يا ليت ما جيت يا ليت
على صغر سني همومي كبيرة
حي بجسد والداخل من الجسد ميت
حتى الشعر ما كان لي فيه رغبه
ومن الهموم أصبحت شاعر ولي صيت
واللي على شانه كتبت القصايد
ما يدري إني عنه بالشعر ضحيت
شفته ورحت أمسيت لاهي ود اله
وأصبحت لكن ما هو بمثل ما مسيت
أقابله فاليوم ستين مرة
ومن يوم حبيته معه ما تلاقيت
دجت الشوارع لجل أناظر حبيبي
وما يوم في عمري لجل شخص دجيت
كانت دروبي طيبه في حياتي
البيت للمسجد .. المسجد إليا البيت
أمشي على موطي قدامية وأقول
هنا مشي من فتت القلب تفتيت
أنا رجل جداً شقي حظ وهموم
وإذا هويت إنسان يعني تهاويت
يا مسبب إذنوبي عليك الله أكبر
أذكر لا يممت وجهي وصليت!!
علقت قلبي بين أصابع يدينك
وتركت خلفك شخص موات وأقفيت
ما أعز نفسي عندك تدري لماذا ؟؟
لنى إذا عزيتها عنك ذليت
تعال لجل إيصر للحب لذه
وأتصيرني مصباح وأصيرلك زيت
شوف الشحوب اللي كسا الجسم كله
حبك رجيم الجسم لو ما تمشيت
أبكيك وأنته حى وشلون صارت
عمرك سمعت إبحي له يبكي الميت!!؟