عيادي

• العيد جانا... وأصبح العيد عيدين
عيد رمضان... وعيد حضرة قدومك
يوسف محمد العنزي
• كل عام... وصوتك يا بعد عمري بخير
كل عام... وضحتك الجميلة جميلة
تعالي طيرني معك... ودي اطير
خذني... من يدين الزمان البخيلة
نايف الرشيدي
• الله أكبر... حتى الأشواق تغتال...!
وين الرسايل... والوله والمواعيد؟
ماني مصدق... كيف نوصل لهالحال؟
شلون أنا... ما شوفك بكشخة العيد؟!
ماجد الخالدي
• يا زارع بصحرا خيالاتي... أوراد
سقيتها من نبع... صافي وريدي
العيد لا شفتك... غدا جملة أعياد
وش لي بعيد الناس... دام أنت عيدي؟!
حزام الشاهين
• البعد ما يرحم... ولا صارت مواعيدي تفيد
خليت عيدك حجتي مدري البعاد... أش فايدك؟
لو كان همي فرحتي... بالعيد والثوب الجديد
ما شفتني وأنا أنتظر عيدي عشان... أعايدك
تركي عواد
• وشلون اعايدك... وأنت أصلاً كذا عيدي؟!
شوفتك فرحة... وصوتك صاحبي فرحة
لكن مع العيد أباجدد... مواعيدي
مادمت موضوع يصعب للعرب... شرحه
خالد المحسن
• العيد عندي بس ما هو... ضحى العيد
العيد عندي... يوم أشوفك قبالي
ما للفرح عندي... حدود ومواعيد
ولا ينحسب... بأيامها والليالي
العيد عندي... شوفتك يا أتلع الجيد
في فرحةٍ ما بين غالي وغالي
شوفه تأكد لك... مدى الحب تأكيد
في عين منهو عنك... ماهو بسالي
ماجد الرشدان
• فرقاه عيد... وجيته طهر وإيمان
وأكبر حظيط... اللي أنغفر فيه ذنبه
عدا الشهر وهلال عيده... ترا بان
يا الله تجزي كل مسلم... «بتعبه»
حمود الخطيمي
• تقول نفسي... أترك العيد والناس
من دون خلك... ما به اليوم عيدي
نافع بن طواله
• العيد فرحة... بها العربان مجتمعة
كلٍ يعايد... قريب له مع الغالي
في كل عامٍ... يجينا نشعله شمعة
من عقب شهرٍ... كريمة فيه الأعمالي
خالد الدعسان