بعض الهقاوي

الجادل اللي يهب النود مجدوله

لافززّه من هدوءه .. ينتثر ثاير

ان مر مع صحصحٍ جردٍ نبت حوله

زهر الخزامى مع النوّير والناير

لبيه ياثغــرها ... لبيه يالـوله

لبيه ياجيدها المبروم والداير

جمالها فارقٍ عن كل مجـموله

احس حتى القمر من حسنها غاير

شعلاً خذتني على غول الزمن غوله

حظّي معاها .. تقول .. مجفّل الذاير

كنّ الغنج يوم داعب خصرها نحوله

طفلٍ مع طفله .. تلاغـيه .. ويعاير!!

لا اقفت .. تنثّر عطرها تولةٍ توله

واقفي بثاره .. تقل يسحبني بواير

مبطي مع اهل المثل والعرف مقيوله

الحر من فطرته يفهم على الطاير

عنيده .. وغيرها ماتآخــذ بقوله

اعوذ بالله .. ودمها دايم ٍ فاير

الله بلاها بتفس ٍ دوم مشغوله

والله بلاني بها .. وبحبها الجاير

الدّها لا ازعلتني .. نظره زعوله

وأن لدّت بعينها نستني اش صاير

مانيب من للعذاب يروح برجوله

لكن بعض الهقـــاوي سوقها باير

اخاير النفس اقول الغبن وشوله

ماني بماشي لها .. واوصل وانا اخاير!!!

ياما حدتني على يمكن !! ومعقوله!!

وياما اتركتني على الحروه وانا حاير

وان قلت ليل المفارق ليل ياطوله

لكن .. متى ودّش الفي يمّكم زاير؟

قالت : بفبراير اللي جاي ..مهبوله!!

يالله عرفنا رجب .. وتقول فبراير