?مثل الأصابع?

بسكر آلاقلام وآعاف الأشعار

ماعاد تصلح لي عشاني بنية

الشعر مملوكن لوافين الاشبار

وجهة نظركم مابها نرجسية

حتى اسمها في مجتمعكم يجي عار

كلن عن اسم أمه يداري خويه

مجنون ليلى مات ماجيب له ثار

ضيع شبابه سبة العامرية

وحطن نبي الله بين أربع أسوار

ولاسجل التاريخ فيهن نبية

آخر هل الجنة وبوابة النار

وتباعة الدجال وأصل الخطية

هذي ظليمة ياطويلين الأعمار

خافوا من الله يارجال الحمية

الدين كرمها بحشمة ومقدار

وبهالزمن مازال به جاهلية

كل المفاهيم الجميلة والأفكار

كفوف حوا من وراها ندية

هي درة ٍ ماجابها كل بحار

ريحانه بماي الحيا مِرْتِوِيّه

مادوجت عريانه يمين ويسار

ولاغنت الموال والسامرية

ثنتين منا يحجبنّك عن النار

وأربع حلالك كان به مقدرية

والوالدة حاول تكون ابنها البار

تحت القددم جنتْك عقب المنيه

هذا وفيهن جاهلاتٍ وقصّار

مثل آلاصابع ماتجي مِسّتِوِيّة

آقولها تصريح مايقبل إضمار

ودايم نقول الحق فطره سوية

وصلوا على من جاله الوحي بالغار

محمد المختار خير البرية