الدايم الله

ياللي طلبتم نبذة من قصيدي
عن واقع المفعول لا انقص ولا ازيد
انا غرامي وانبساطي وعيدي
تفريعة القرناس بارض بها صيد
لا شطب الصيحان روس الزبيدي
والعشب جاله بالمثاني عناقيد
والبدو ما يبدي لهم بالشديدي
تسعين ليلة ما حكوا بالمواريد
ضيق بهم در الغنم والجميدي
ما يشربون الا حليب المجاديد
والبل وبرها طار وابدل جديدي
وردوم على الفاطر سوات المجاليد
من فضل ربي كل يوم تزيدي
قامت عشايرها تسن المفاريد
والفجر تسمع للطيور اتغريدي
ليل الشتاء طوله عليهن سراميد
هذيك والله منوتي يا عضيدي
لا جابها الله من صدوق المواعيد
ما كفه الدير لرجم المفيدي
وذوب على خشم الخدار ومشاحيد
مجهود من نو الجبه السديدي
وحصل لها قبل العقارب تماديد
غثوه على روس الشجر والهضيدي
وساق وتساقي للنفوذ وتخاديد
وفيض على فيحان ريف العبيدي
نبي لنا بشعاف لوقه مطاريد
على اسوق مقربات البعيد
من فوقهن يا زين مزح الاواليد
لا فرع النادر وطلعه وكيدي
وحول على جول الحبارى تقل حيد
وسلط على الخرب النشيط العنيدي
حاسه وداسه والحباري ملابيد
يقضي بها الصقار يوم جديدي
في ساعة مابه وجيه مقاريد
هذا هوى بالي وهذا رصيدي
سوق النظر بين السهال الجراهيد
لو كان من طرد الولع مستفيدي
فتق بقلبي واعذروا يا الاجاويد
نومي تحت طل النجوم الجليدي
عن كنب ومنجد زل تنجيد
لو لامني خطوا الغشيم البليدي
طرد الولع ما به عليه مناقيد
وشف الفياض المخضره يالحميدي
وشمة ذعاذيع الهوى عندنا عيد
وللكيف ذوق ولاستماع النشيدي
لا قلطوا رسلان والا بغاديد
ثنتين هيل وثالثتهن عويدي
وكل على ما تطلب النفس وتريد
وقدوعهن من طلع هدب الجريدي
احسن نمونه من نما شرع الغيد
وسوالف ما قيل فيها جحيدي
بالصيد لانمة ولا هي هرابيد
ساعات نقضيها ويوم سعيدي
ولا دامت الدنيا لعامر وابا زيد
الدايم الله والفنا للعبيدي
والرزق عند منزل الدر بالديد
محي الهشيم اللي عروقه هميدي
رزاق ما تحت الصخور الجلاميد
والله يدبرنا على ما يريدي
وصلوا على اللي وحد الدين توحيد
شعر
بدر الحويفي الحربي