غصه قصيرة...!

غصه قصيرة او قل قصة قصيرة تروي حكاية شاعر من خلال باقة مميزة من الابيات المختارة من قصائده، التي تمثل مشاعره واحساسيه من خلال تجربته الشعرية الممتدة.
غصه قصيرة لهذا الاسبوع مع الشاعر والكاتب حمود جلوي والذي نحلق معه وبه عاليا من خلال هذه الباقة الجـــميلة من الابيات:
لاحلامي البارحه ... سولفت عن جرحي
عن عمري الغالي اللّي ضاع... باسبابك
كن بغيابك ... غلاك انهى على فرحي
الله يلعن غلاك ... ويلعن غيابك
* * *
يا كثرهم ... قبلك احبابي وخلاني
اعطيتهم دم قلبي ... بس خانوني
مشكلتي اللّي بقبلي دوم بلساني
ما اقدر اشوف الخطا ... واسكر عيوني
* * *
ما علموك ... شكثر بعدك يضايقني؟!
ما علموك الجفا وان طال ... ما خونك؟!
كني اشوف الغلا للموت ... سايقني
وش حاجتي بالعمر ... لا عشت من دونك؟
* * *
افرض اني جيت لك ... محتاج وعيوني تبيك
وامنعتني لا ابين حاجتي لك ... عزتي
يعني المفروض تفهم... مقصدي من قبل اجيك!
انتظرني ... كل ما طولت هذي حزتي
* * *
ابيك جنبي ... كل ما ضاق صدري
وابيك فرحي ... لا قست سود الايام
وقل للي ما يدري ... وخليه يدري
انك بعيني ... تسهر الليل وتنام
* * *
عيبك ... انك كل منهو يجرحك تقول خير
راجع ايامك وحاول تفتكر ... منهو خسرت؟
مستحيل الحب الاول ... يشبه الحب الاخير
يبقى الاول مكانه ... غبت عنه او حضرت
* * *
من تجربة حبك ... وصلت لقناعة
إذا بغيت انسان يغليك ... خونه!
يشتاق لك ... اربع وعشرين ساعة
دامك تخونه ... شرط تاخذ عيونه
* * *
من عقبها ... ما عاد لي خلق للناس
من يوم راحت ... راح قلبي معاها
فيني غلاها ... شوصفه ماله قياس؟
اقسم قسم ... انه ذبحني غلاها
لو كان في وجه الزمن ... ذرة احساس
ما كان لحظة عن عيوني ... خذاها
* * *
ما جيت لك عاني ... عشان اتعداك
ولا تعديتك وانا جيت ... عاني
ثمنت وصلك ... يوم جربت فرقاك
مرة خسرتك ... ما ابي اخسرك ثاني
* * *
خل الجروح اللّي بقلبك ... لقلبك
عندي من جروح الزمن ... ما كفاني
ولا تنشغل فيني ... وخلك بدربك
ربٍ عطاك من الصبر ... ما نساني
* * *
الجرح يكبر بقلبي ... وانت ما تدري
والنوم يسهر بعيني ... يا بعد عيني
حاولت اشيل الغياب ... وطحت من كبري
حاولت اغيب ... ولقيتك حاضرٍ فيني
* * *
يا سيدي ما هي سواليف ... عشاق
حتى تموت بصدر اهلها ... الاماني
انا بشر ... لي قلب واحس واشتاق
واشقى واعاني مثل ... ما انت تعاني
* * *
بالصدر ضيق ... وداخل العين عبره
والفكر شارد بالامل والتمني
واحس في صوتي ... للاحزان نبره
من شدة التنهات ... فيني تغني
ياللي سرقت الكون ... مني بكبره
من هو قدر بالكون ... يسرقك مني؟