نسيتك?

ودعتك الله عسى في بعدنا خيره

لا تطري فبالي ولا أطري فبالك

هذا قصيدي بطا مابان تأثيره

وهذي سنيني مضت ماذاقت وصالك

لا صرت ضامي شعور تزيد هالحيره

وشلون تروي عطش قلبن تعنالك

الا أبسألْك عن قلبك وتغييره

قلبك من اللي خذاه وغير احوالك!!

ما جيت أعاتب ولا جيت بهدف غِيره

وش فايدة هالعتب والحب متهالك

جيتك أعينك على حلمي وتدميره

على ما هنت يومي شفتك لحالك

جيت أبتسم للزمن وأحضن مقاديره

وأبوس راس الجروح اللي من أفعالك

أكذب اذا قلت عقبك زانت الديره

لا صرت كل الوطن والعين مدهالك

وأكذب إذا قلتلك ما جبت بك سيره

ياما بذكرك ضويته ليلي الحالك

أصرخ «نســيـ.. واحتضن هالدرب وأسيره

واطرد ورا... ــتك» لين تجيبني قبالك

من زود شوقن سرت يمك طوابيره

شف كيف روحي غدت تحسد بك أظلالك

وشف هالقلم كيف عاندني بتعبيره

اكتب «كرهتك» ويكتب «اترك هبالك»

وشف هالطريق انطوت عقبك مشاويره

وشف هالخطا كيف تثقل دون منزالك

وشف كيف قلبي أسيرك عاف تحريره

وشفني وانا أعانده وأقطع به حبالك

خلاص أبدفن ألم وأحضن أمل غيره

ضاع العمر رابط آمالي بآمالك

مادام حبك تحدى في مضاميره

اسمع صهيل الفرس من تحت خيّالك

وان جاب زولي خيالك في تصاويره

أو مر صوتي على سمعك ونادالك

سم وتعوذ وردد: علها خيره

لا تنتظرني... ترا طيف وتراوالك