مثل الدموع
الحزن تعبير والدمعه خلاصة شعور
والشعر مثل الدموع. وصدق الاحساس غير
هذا أول الغيث يا حبر القلم والسطور
مبطي وانا أرد مافي خاطري واستخير
تعبت والوقت ينبش في قبور الصدور
وأسرار الأيام لو طال المدى وسط بير
إلى متى؟ والأماني كذب. والصمت جور
ورزنامة العمر حتّت من ورقها كثير
وين انت يا أغلى ظلام ما يساويه نور؟
صاحبك وده يكمل كل عمره ضرير
يا صاحبي دونك القى الذنب والعرف سور
والنفس يا حبها للذنب. والقلب طير
اي والله اني تعبت ألف حولك وادور
ما ودي اسمع جوابك عن سؤال المصير
شفها تساقط من عيوني كبار الأمور
واشوفك اكبر من الحاجة وحلم الفقير
اشتقت لك. يا قراح الما وصوت الطيور
الأرض جردا ويغشاها... الضما. والهجير
تعال. واكسر بحلو الذكريات الغرور
اقولها والأماني في رمقها الأخير
وجه الحياوي لعب فيه الزمان الجسور
واللي صفالي من الأيام قلب وضمير
الحاصل إني عجزت القى لذنبك طهور
واستغفر الله بعض الصبر ما فيه خير
