واحة سراب

شيب عيني كل مافكيت باب

الرياح تصك بيباني قهر

حلمي اللي ماعرفته لين غاب

صرت اصوتله وانادي منكسر

يابروق الغيم يامزن و سحاب

قاعتي ضميا ولاشافت مطر

ياركود الما على واحة سراب

تقترب ثم تبتعد ماتستقر

يالذهاب اللي قطع كرت الاياب

يالاياب اللي كروته تحتضر

المسافة طالت بوقت الذهاب

والطريق بساعة الحاجة عسر

وخطوتي عجلة بعد ذاك الغياب

كل خطوة ترمش بعيني صور

الغموض التف يكسيه الضباب

والاماني الضايعة نقطة صفر

جارت الدنيا وسددت الحساب

من يضيع الوقت يتعب بالسهر

الخسارة بالصغر درس وثواب

والعقوبة من خسر تالي عمر

تشرق البسمة وتغرب بالعتاب

وتمسح الدمعة من الفرحة سطر

شابت الصفحة وانا حبري شباب

ماكتبت بصفحة ايامي خبر

من يعوضني ليا بعت الكتاب

من يعلمني من الماضي عبر

السوال ينوب عن حضرة جواب

والاجابة العابرة .. غِض النظر