للوطن التحية

بمناسبة عيد الاستقلال وعيد التحرير تكثر المشاركات من الشعراء بهذه المناسبة وهذا شاعرنا المميَز بن شقلب يقول

بديت بسم الي خلقنا من الطين

الواحد الوالي عليه اعتمادي

الحمد للي ما يخل الموازين

اموّزع الارزاق بين العبادي

ومن بعدها ياهاجسي دربك يمين

قلبك يعرف الحق مابه سوادي

سوق التحيه للوطن واختر الزين

مثنيّةٍ فيها من الطيب كادي

والحاسدين الخاينين الرديين

محشومةٍ منهم ضواحي بلادي

الدار في ظل الشيوخ العزيزين

ماهي بظل الي عن الراي غادي

لخوان مريم لاطمين المعادين

وصباح الاحمد قدمهم بالشدادي

الشيخ ابو ناصر غنات المساكين

لاراح فازع ما يعرف الركادي

امحنّكٍ لامن غدا الصف صفين

تشهد له شيوخ العرب ما يقادي

وشعوبنا من قبل واحد وستين

ومن قبل فبراير تجيه العيادي

ما منهم اللي فالكويت امتناسين

خيراتها وظلالها بالحمادي

وحنا بها نعتز في راية الدين

ومن دونها ننطح جموع المعادي

عقالنا فالحرب مثل المجانين

من شانها نارد على الموت عادي

وجيوشنا لادكت ارض الميادين

ما فيهم اللي عن ثرى الدار هادي

رهن الاشاره لو تثور الدخاخين

واميرنا ما نخذله فالهدادي