كلي لك

ما طفت شمعتين ولا انزلت دمعة

ولا تعب هالقصيد وهو يغنيلك

ما سرقت الفكر والناس مجتمعه

ولا رقبت السما راجي هماليلك

ما بغيتك شفا والروح متوجعة

وما قتلت المدامع في مناديلك

ما صفعني بغيابك هالزمن صفعة

ولا ركني على رجوى مقابيلك

من يقول الحزن بالعين له لمعه!

ومن يقول السهر يحلا مع ليلك!

من يقول انطرك بايامي السبعه!

ومن يقول انجرف قلبي ورا سيلك

كل معتم غيابك ضوته شمعه

وكل طيف انقتل بآخر مواصيلك

مات ذكرك بقلبي وانكر ضلعه

ولا رحم مجملك باقي تفاصيلك

ووجهك اللي رواه الزين من نبعه

حسنك البن وطعم الهيل تدليلك

ما قتل مثلي ولا اثر بطبعه

لو فنى جيلك بسكرة فناجيلك

ما رجت غير روحن فيك متولعه

ولا صرخ غير صوتن منك يشكيلك

ونفسي اللي غدت بالبعد مقتنعه

تشفق لحالتي وبودها تجيلك

كل ما قلت عفته وانتهى وضعه

جاوبت في بروده حال يا حليلك

وليلي اللي مضى ما ذقت به هجعه

لو مضى ليلك بغفوة مظاليلك

تدري اترك كلامي ضره ونفعه

واقرب ابغي بكلمة راس احكيلك

من كثر ما ولهت لموعد الرجعه

صار شعري غصب عني يناديلك

قلت ابعيش دور ان الثقل صنعه

واثر كل بيت اخيره قال كلي لك