طاري الولع

الشاعر الكبير المرحوم سمير بن صليهم شاعر وصقار له الكثير والكثير من القصائد القيّمة وقد اخترنا لكم هذا الاسبوع هذه القصيدة

الراس شاب وداخل القلب توه

توه بعد طاري الولع منه مازال

اليا عسرته تلني يم نوه

يميل بي لو كان ماني بميال

أعالجه بأسلوب عزمٍ وقوه

وأحيل مطلوبه ولاهوب ينحال

يبي يعرضني محابيل سوه

متجاهلٍ بعد المسافه والأهوال

ليل وظلام وطافيٍ نور ضوه

والدرب مع صم الحصا وأشهب اللال

ياقلب أهد وارتاح وأرشاك طوه

مالك ومال اللي له ألوان وأشكال

ياعونة الله كيف عندك إجروه

تطمح بجيلٍ وأنت ماضٍ لك أجيال

تبي تسوي لك صداقه وخوه

مع من تريد وماطرالك على البال

ماتفتهم دورات وقتك وجوه

خبرك عتيق وغيّر الوقت الأحوال

جيلٍ فنى ماينفعك ريح بوه

لو علقوا مثله أصورٍ وتمثال

ومافات من دنياك فيه الكفوه

عده مضى وأحرص على طيب الأعمال

المرحوم: سمير بن صليهم