«حفلة جراح... ليس إلا»...!

وهذا عام انطفى سراجه...

وراح... وما بقاله... الا

ساعات وجراح... .

وكلبونا كان يلبس

الكثير من الـ تفاصيل

اللعينه له وشاح... .

من ينايره الى... ديسمبره...

كنا وكنا... نصب الغيم

فـ قلوب ٍ شحاح...!!

لين ماتروى... ونذبل من عطانا...!

ياخطانا... اللي تكدس...

من زجاج و فوضوية...

وانكسر فينا وطاح...!

آه يا هذي الـ مدينة

الـ مرهقه في كل ليلة...

الـ كثير اللي لبس لون وقناع...

وباع «طهره» بـ سوق خردة...

وانفتاح... !

أيش أكثر لو اسولف...

او أفضفض لك عن الجرح...

اللي في ظهري...

وياخبث الرماح...!!

ايش ودك تعرفينه...

عن سكوتي ياما «كفنه» التردد...

والـ متاح...!

تصدقين... مافي أطهر...

من «دعا هالامهات»..

قلوبهن بيضا وحمايم

وانشراح... !

وفيني أكثر... من «قبيلة»

شيخها مكسور... والذل

استباح...!

ليه انااللي جيتي... يّمه...

وغيري... يهديلك «قصر وأحلام»

والماس وصلاح... !

ومن يهمه... !!

في زمنا  كنت «طّيب»...

والا انك حيل «ساذج»... !

منهو فينا استراح... !!

يووووه... يابنت الـ بساطة...

من اي زمن جيتي... ومثلك...

ماله مابين الـ خلايق... اي معدن... !!

ليه انا اللي بين الآلاف النوايا...

تفرغينه محتواه... ومانوى

يحكيه عمدن... !!

ايش افرق عن « بقيتهم»..!

وحنا عيال « تسعه»..

واختلاف الكل يكمن... في

صدى تربيته... وذريته... !!

طيب وفلاح... !!

يا عيونك... لاتناظر فـي

عيوني... !

أدنى نظره تجيبني... ارض

وبراح...

وانا يكفيني صدى

شيخٍ على ربعي... ومكسور

الـ جناح

الـ تعب فيني على هيئة

تضاريس وجبالٍ سود...

وبروق ورياح...

أعتقيني من علاقات الـ تفلسف...

والنوايا اللي تمرجحها... الـ غريزة...

ماشربت ميٍ قراح...

اتركيني في خنادق روحي الليلة...

اتسول واتوسل لك كفى طيش

ومزاح... !!

لايغرك ضحكتي... لاجيت من

خلف الـ كواليس... الـ ندية

والـ سلالم والنجاح... !!

هذا انا سيرة على الـ هامش...

أصب الغيم لـ عيون الـ عطاشا

وازرع الـ قيعان من طهري...

وياكثر الـ كفاح... !!

قفلي بيبان بوحك... مابها

طهر فـ مدينتنا ، ولا راحة...

ولاحتى مراح... !

الـ نوايا سود واكثر...

والـ شوارع... حيل زحمة...

لايغرك أقنعتهم انها تغري...

مابنا من هو سلم...

من زيف هالغربان...

وياكثر النباح... .!!

زهملي عيونك... دخيلك...

هذا الـ دنيا وحولك... !

اغرسي... كل الـ هلاهيل...

بلهاتك... اقطفي...

كل امنياتك... كلها يومين...

ويبدأ فيك هالعام الـ جديد...

والا انا « معزول خلقه»

مالي ومال الـ جراح... !