المصري أفندي / مسجل بعلم الوصول ... !

مرت الأيام سريعة ورجعنا لأيام زمان... الذكرى الثالثة جاءت والذكريات بتلف وتدور وتفتكر اللي حصل في الميدان... حصار ونضال وشعب عاوز يعيش ومولوتوف وقنابل غاز ودخان... وحصان طروادة لابس عباءة الدين وحقوقيين ونشطاء والمتفذلكين بتوع حقوق الإنسان... واللي فدى الوطن بروحه واللي خرج ينادي بالحرية واللي ركب الموجة وكل اللي حيلته نص لسان... عيش حرية عدالة اجتماعية وقول حق يراد به باطل خلوه عنوان... كل من هب ودب خرج في الزيطة والثورة الوليدة اتركبت وكل واحد عمل فيها زعيم وعامل فيها خيال والثورة كانت الحصان... الكل راكبها بشعاره والكل عينه على مراده وبكره تخلص الزيطة والشاطر اللي يلاقي في الآخر مكان... التورتة كانت كبيرة والغنائم كانت وفيرة والخير كتير والشعار إلهط ما شئت وقدر ما كان في الإمكان ... ما هي فوضى بقى وللا ثورة قول زي ما إنت عاوز هو يعني حد حيفتكر حاجة وللا إيه اللي حصل وإيه اللي كان... افتكروا اننا شعب بسيط طيب وعلى نياته داؤه يا عيني النسيان... ونسوا إننا شعب زي الجمل بيخزن الجميل وكمان الأسية وبيفتكر مين اللي صانه ومين اللي ضحك عليه كمان... نسوا إنه فيه تاريخ بيكتب ويسجل وبيحاسب حساب المليكين وعارف مين اللي أخلص ومين اللي باع وخان... نسوا أن الزمن بيبصم ويصدق ويفرز المواقف وعارف مين اللي كانوا رجالة ومين اللي جريوا زي الفئران... يا سبحان الله سنين كتير بتعدي على الشعوب من غير ما تحس بالخديعة لكن علشان بلدنا محفوظة جه ذكرها في القرآن... بلد غير أي بلد هات لي بلد واحد ذكرها في كتابه الرحمن... بلد مبارك مبروك فيه أصل الحضارة وخير جند الأرض وطن غير كل الأوطان... لكن اللي حصل في بلدنا وانكشاف الغطاء عن المتأسلمين والحكوكيين واللي باعوا الوطن بأبخس الأثمان... في أقل من ثلاث سنوات اتحرر الوطن واتنفس هوا نضيف واتخلصنا من احتلال تجار الأديان... اللي حصل حصل والحمد لله حصلت الفلترة وعرفنا كل الألاعيب وعلى رأي فناننا الخالد الذكر مدبولي كل شيء انكشف وبان... راجعة الذكرى التالتة والناس غير الناس ورجع الأمل لقلوب الناس والضحكة على الوشوش ظاهرة والتصميم على بناء الوطن واضح والنية أكيدة في البنيان... الذكرى الثالثة غير كل ذكرى واللي كان مركوب وعينيه متغطية انشالت الغشاوة من عينيه وخارج وكله تصميم وعزيمة وإيمان... راجعين الميادين وهم فرحانين أخيرا لقوا الفارس اللي عليه العين واللي أطاح بالمخطط الإخواني المرسوم الفارس زينة الفتيان... سبحان الله الهيبة واضحة عليه ومعروف بالصوت والصورة مين قال إن المحروسة تحكمها وجوه تصيب العيون بالغثيان... مش قالوا من أحبه ربه حبب فيه عبده عايز إيه بعد كده إجماع عايز إيه تاني كمان... بص على خطواته فكر في لمساته شوف رد فعله وحركاته تحس أنه قدر والأقدار مش بتكرر كتير عبر الأزمان... الناس في الذكرى الثالثة حتشارك بالملايين وتنادي كمل جميلك واسمع هدير الجماهير مش بخاطرك ولا بمزاجك تكسر بخاطر رجالة مصر وستاتها وشابتها وشيابها والشُبان... الكل بيناديك إنزل الله يخليك كمل علينا الفرحة وإزأر بزئيرك خلي البلد تنضف من الغربان... اتعودنا منك الشجاعة والإقدام فلازم تكمل جميلك صعب شعب مستنيك يصاب بالخذلان... اللي حيحصل يوم 25 يناير حيبقى إجماع ونداء صعب حد يرفضه وصعب شعب يكون أمله في شخص وحد وطن وحس معاه بالأمان... حنشوف ونلاقي ملحمة انزل يا راجل ده لو ما لكش إنجاز كفاية عليك إنك خلصتنا من كابوس اسمه في القاموس إخوان... تصدق الرفض يبقى خيانة عظمى وتحطيم لأمال شعب بحاله مستني تكمل فرحته شعب نفسه يفرح شعب بسيط غلبان... النهارده 25 يوم الحسم والاختيار اخرج للناس وقررعمرك ماهربت من مصيرك وقدرك عمرك ما كنت جبان... الفرصة بتيجي مرة في العمر صعب تكسر إرادة شعب عظيم عاش تجريف وتوريث وسنة سوده من حكم الفاشي شعب عاش وشاف كتير حرمان... انزل وشعلل الميدان هو ده وقتك ودورك هو ده فعلا أوانك فعلا آن الآوان...!!

الميدان النهارده له طعم تاني حيبقى مش بس ميدان التحرير ده حيبقى ميدان الأحرار... ده أول عيد بعد زوال الغمة وبعد ما خلصنا من عصابة الأشرار... دي أول فرحة بجد بنعيشها ودي فعلا بداية الاستقرار... كفاية شفنا أيام سوده زي قرن الخروب كفايه خلصنا من جماعة العار... الشعب خلاص عرف طريقه وخارج للميادين يفرح خلاص مفيش حاجه حتمنعه لا حواجز ولا أسوار... خلاص الإرادة بقت موجودة والنية الخالصة لوجه الوطن معروفة خلاص مفيش أسرار... جماعة وخلصنا منها بحمد الله وكانوا فاكرين إن عنهم شاطر أتاري فيه شعب بحاله من الشطار... الشعب خلاص قال كلمته الشعب خلاص إتوحد ولا عاد فيه مكان للاختلاف ولا عاد مقبول أي انتماء غير لمصر وملعون أبو أي تيار... الشعب عاوز يعوض وكسته من حكم متأسلم فاشي عاوز يلاحق الزمن عاوز يلحق القطار... الفرحة في الميدان حتبقى فرحة بجد ولا حد حيضحك علينا ولا حيقدر يركب الموجة لأنه عرف طريقه وعرف كمان يختار... مبروك علينا ياشعب ثورتنا رجعت لينا من المتأسلمين والمتسلقين والخلايا النايمة وحركات الفجار... يارب تكمل فرحته واللي بالي بالك يفرحنا وياخد بجد القرار... حينزل وبقولها واضحة لأن الهروب من الميدان مش طبعه ولا الخضوع والفرار... اسمعها مني كلمة اتوكل على بركة الله والشعب معاك وإياك تخذله مش بعد الحب ده يكون جزاؤه جزاء سنمار... انزل يا راجل واجه مصيرك وقدرك قوم امحي الشك باليقين وكمل جميلك كمل معانا المشوار... قوم وواجه واحسم أمرك وكمل جميلك مفيش من إراده شعب فرار... الجميل مش جميلك ده جميل شعب كافح وساندك شعب محتاج بجد يطلع عليه النهار... قوم وطل علينا واخضع للإرادة واعزف معانا نشيد الفرحة على أجمل الأوتار... مرسل ومسجل بعلم الوصول والشعب مستني القرار... آي والله الشعب مستني القرار...!!

[email protected]