قصــة جروحــي

إشراقة جميلة ومتميزة للشاعر العذب حافظ الرسن:

يابحر جيت أشتكيلك ضيق/ صدري

روحي مخنوقه/ من كفوف الكلام

تبكي دموع الحزن/ بعيون عمري

والشفا عطشانه/ لماي ابتسام

يابحر منهو يشيل/ جروح كثري؟

ومنهو آهاته بحضن صدره/ تنام؟

جيتك بحال الغريق/ ونته تدري...

بقشه  يحس النجاة/  ومايلام

تمشي بسطور الورق خطوات حبري

ضيعت في قصة جروحي/ الختام

يابحر تعبان أنا/ وأتعبت صبري

من يفك شمسي/ من قيود الظلام

جيتك أخفي من عيون الناس سرّي

يابحر لا تكشف أسراري/ حرام

مثل مدّك والجزر/ مدّي وجزري...

جيت أهدّي بشكوتي/ موج الكلام!