لذة الابتعاد

شعر: سعد براك

شاعر ما يحب الا تراب الكويت

وعاقل شق صدر الحلم والاجتهاد

في حضوري بنيت من المواقيف صيت

وفي غيابي أحس بلذة الابتعاد

بي من الشعر لحن ينتزع كل بيت

كل ما ذعذع الغربي وهب البراد

ميزة الشعر ماهي كم خذيت وعطيت

الاحاسيس ماهي بورصة واقتصاد

ورحلة العمر ماهي كم كسبت وجنيت

يالله الاتكال ويالله الاعتماد

والدروب الطوال اللي عليها مشيت

كانت بعيني الساحة وكانت بلاد

آه ياشوق ياللي فالحنايا ربيت

لين أخذت المشاعر شرب والفكر زاد

كم شربتك شهاليل ورويت وضميت

وكم صحيتك مراد وكم حلمتك رقاد

اتحالا حروف اسمك ليامن قريت

واكتبك صدق ما يدخل عليه اعتقاد

يا حبيبي تراي من الفراق اكتفيت

لي متى وانت حلمي والغلا والمراد

هذا انا بيت لو وهذا انا بين ليت

ازرعك مير عيا لا يحين الحصاد

ودامني كل ما تطري علي احتميت

مثل فزعة شجاع ومثل فزة جواد

والله اني لاسلمك الفخر لا حييت

وان توفيت لا تلبس ثياب جداد