الخلاصة

| بدر القبي |

اذكر اني ياحمد رجل اجتماعي

... واصل بربعي ولاحب القطاعة**

واذكر ان البال للموجاب واعي

... ما تأخر عن مواجيب الجماعة

مير صار الوقت لاويلي ذراعي

... من عقب ما كنت لاويله ذراعه

لي سنه مالي مع العالم مساعي

... . صار مالي في مواجهم طماعه

تنقطعت، وأحسب اني بانقطاعي

... أتلاحق حال ما ودي ضياعه

ومن ضياعي قمت أشارك في ضياعي

... وانجرفت بسيل همي واندفاعه

صرت غير، وزاد همي والتياعي

ما بقى لا حيل فيني، لا استطاعه

منقهر، مشحون، ضايق, اندفاعي

امتنرفز, راس متعبني صداعه

ليت لي صدرٍ على الضيقه صناعي

.كل ما ضاق الصدر زدت اتساعه

ياحمد، كل شي له عذر ودواعي

... من تكدر خاطره يطوي شراعه 

انقطاع الناس بالمبدأ جماعي 

... كلٍ لحاله وتحسبهم جماعة

مو ضروري.. ياحمد بان اقتناعي

... يقنعك، لو قمت أقنع فيك ساعه!

الخلاصة شخص، يقطع، واجتماعي

... اعرف ان الوقت لاويله ذراعه