د. سعيد فهمي / المصري افندي / الفتى سُليّمَان...!!

| د. سعيد فهمي | هو زي أي جندي شريف من فصيلة خير أجناد الأرض في كل زمان... لكن كان من فصيل خاص صاحب شخصية وهيبة مخلص لقضايا بلاده ولا عمره يوم فرط أو خان... كان زي أبو الهول كتوم مُهاب شايل على كتفه هموم وطن بحاله وكان حالة استثنائية ونموذج نادر في هذا الزمان... جبل رعديد صنديد حامل على أكتافه هم مصر ومكانة مصر في كل وقت وأوان... حامل وكاتم الأسرار وأمين خزينة مصنع الأبطال وعميد كتيبة الفرسان... يا عيني عليكي يا مصر لما يفضل فيكى الأقزام وأشباه الرجال ويحرم الموت منك البطل الجنرال سليمان... مبروك لأصحاب قانون العزل السياسي في البرطمان المنحل اللي خطفه جماعة الخير خلوا أغلبيته من السلفيين والإخوان... مبروك ويارب يكون الرعب اللي أصاب جماعة الخير يا عيني واللي راحوا في ساعة وأصدروا قانون للعزل بعد ما أصاب قادة جماعة الخير بالذهول والهذيان... عباقرة قوانين العزل والقوانين المسلوقة حبسوا أنفاسهم عند ترشيح الجنرال وحسوا بعد قراره بالضآلة والهوان... الكل في جماعة الخير افتكر بعد ترشيحه الأيام الخوالي والجحور والسراديب واستعادوا ذكريات زمان... وعلشان على رأسهم بطحة خافوا على صعود الجنرال لكرسي الحكم وظنوا حسب خيالهم المريض وزي ما بيتمنوا لمنافسيهم العودة من جديد لأيام الليمان... الكل ارتعدت مفاصلة وكل مكوناته وبقوا في حيص بيص وضاع منهم الإحساس بالأمان... إزاي بعد ما حققوا أكبر صفقة في حياتهم ييجي واحد ويحطم امالهم ويلغي أحلامهم يبقى الحل محاولة إلغائه مهما كان... راحوا وفصّلوا القانون في ساعة زمن علشان يعزلوا الجنرال لكن كانت المفاجأة هي عدم ترشيحه بسبب اختلاف مريب في التوكيلات وكانت النتيجة اللي طشِّت قرنهم هوعدم قانونية ترشيحه وكان القرار هو الحرمان... آه يا زمن كل شيء فيك بقى خارج التوقعات والدليل شفنا القوالب نامت والإنصاص يا عينى فيه قامت والنمل طلع له أسنان... هو فيه إيه يا مصر وليه بقيتي قاسية علينا كده سبحان الله فعلا الموت بيختار الأخيار ويسيب لينا المبقلظ والمكلبظ وأبو نص لسان... سبحانه له في ذلك حكم وأكيد ده كاس وداير علينا لكن التوقيت ملكه هو بس الخالق الحكيم الرحمن...!! لكن ورغم أنه لا شماتة في الموت إلا أن جماعة المتأسلمين من كل فصيل أعلنوا الشماتة والفرحة وراحوا عالراجل وهاجموه... ورغم إن الحديث بيقول أذكروا محاسن موتاكم إلا أن خرج ولاد الذي والذين ونبشوا تاريخ الرجل عاوزين يفضحوه... اللي راح وأفتى بعدم جواز الرحمة عليه واللي أفتى بعدم جواز العزاء فيه وكأنه من كفار قريش وهم أهل التقوى والإيمان ولواء الفضيلة هم اللي بيملكوه... فجأة امتلكوا مفاتيح النار والجنة وصكوك الغفران وتدخلوا في شرع الله والميت كمان بيحاسبوه... مين قال إن البشر إن كانوا في الأصل بشر يبقى ليهم حق الفتوى في حساب الموتى ومين اللي بيقرر مكانهم عند ربهم ومين بيصنفوه... هو فيه إيه ومين الناس دول اللي اتغلغلوا في حياتنا وصاروا زي الوباء عمال ينهش فينا ومين اللي بيصنفوا الناس والوطن عاوزين يقسموه... معقول كل السواد كان في القلوب وبقى كل من هب ودب يطلع ويفتينا وكل فاشل خلاص بقى زعيم وعاوز الناس يتبعوه... يا ترى إحنا رايحين على فين وفين أهل الضبط والربط وإزاي يسيبوا الوطن رهين المحبسين الحقد والتطرف اللي قاعدين بين الناس ينشروه... مش كفاية كفاح ودم شباب زي الفل قاموا وغيروا التاريخ وفجأة لقينا جماعة انتهازية راحوا على الجاهز وركبوا الموجة وحصاد الشباب لهطوه... كانت ملحمة غيرت وجه مصر كلها لكن علشان هي ثورة هواه كانت هي ساعة الصفر اللي بيها جماعة الخير حلم 80 سنة حققوه... يا ترى مين اللي فرش الأرض ورد للمتأسلمين ومين اللي فرط فينا وسلمنا تسليم مفتاح لتيارات غريبة عجيبة حزموا مستقبل البلد وبأجندتهم عاوزين يحكمونا ويحكموه... الأعمار بيد الله سبحانه لكن موت سليمان المريب وفي هذا التوقيت لغز كبير الناس لازم يعرفوه... يا ترى أوراق سليمان اللي زي البير الغميق واللي فيها كلمة السر للتيارات المتأسلمة وتاريخها حتندفن معاه ومين يا ترى اللي عارفين السر وبموته عاوزين يدفنوه... يا ترى مين اللي نفخ في صورة جماعة الخير ووهم الناس بقوتها وإزاي كل نظم الحكم السابق كانت بتتعامل معاها وحجمها كانوا عارفينه وإزاي قدروا يحجموه... فعلا الصيت ولا الغني لكن وحق لا إله إلا الله الشعب المصري اللي بلع الجن بكافه أشكاله مش حيطاطي وعن قريب عفريت العلبة واللي وراه بإذن الله حيصرفوه... يا صحبه سليمان ويا رفاق الكفاح الطويل مصر أمانة ووطن أصيل مالناش غيره أوعوا تفكروا تخونوه... أرجوكم فوقوا البلد بتتسرسب من بين إيديكم ولو تركتم بلدنا للتجارب مش حتقدروا بعد كدة تلموه... ملعون أبو الخنوع على التواطؤ على كل جهة فرطت وتهاونت في أداء دورها وسابت وطن غالي لدود الأرض ينهشوه...!! الله يرحمك يا سليمان أيها الرجل الغامض صاحب الأداء المميز والسمعة الطيبة الوطنية... الله يرحم كل صاحب بصمة خدمت وطن مليء بكوادر موجودة وصامتة وياريت تخرج عن صمتها وتنقذ بلدنا من الهيمنة الوهمية... الله يرحم موتانا جميعا ويرحم بلدنا من كل اللي فرط في الحفاظ على هوية مصر المدنية... الله يرحمك يا سليمان يا صندوق الأسرار اللي لازم ينفتح على كل شعب مصر علشان نعرف تاريخ الصفقات وتوزيع التركات وخطط جماعات الخير إيه هيّ... لن يرحمنا التاريخ لو كتمنا أسرار سليمان ومواقفه من المتأسلمين وواجب كل من يهمه الأمر أن يكشف الأسرار ويحدد المسؤولية... القضية مش موت سليمان الغامض ولا اللي حرموا الصلاة عليه ولا استمرار لعبة عسكر وإخوانجية... القضية قضية وطن بيغيّر جـــلـــده والـــخوف يبقى زي الحرباية بـ100 لون وهي دي القضية...!!
said_elmasryfahmy@hotmail.com