يا صباح الخير

كل عام وكل يوم وكل ليلة

وكل لحظة عاشها القلب بزماني

وكل شي في خفوقي له أشيله

من غلاي اللي يسولف عن حناني

بين لحظات الخيال المستحيلة

عشتها والحلم لدروبه خذاني

لو نسيت الود ما فاليد حيله

الشوارع والمدن ويالمباني

ما نست تاريخها لو هي هزيلة

كيف تقطعني وأنا هذا مكاني

والقصيد العذب وبيوت جزيله

ساقت احساس على عشقه حداني

والدوا لا شح فالنفس العليلة

والظلام إليا تسيد فالمحاني

واليحاه أيامها المره ثقيلة

بين هم لو نسيته ما نساني

كلها لا شفت طلته الجميلة

تنجلي وتروح عني في ثواني

لو أبوصف نظرة العين الكحيلة

كل ما يقبل عليه ما مداني

فالحلا ما شافت عيوني مثيله

يا صباح الخير لا منه لقاني

ما خذ قلبي ومتعبني رحيله

بين لذات القوافي والمعاني

والمسامع ما تبي صوت بديله

والغلا من مصدر كفوف الأماني

في عيوني صار يسواله قبيلة

ما أبي غيره ولا أبي شخص ثاني



شعر: مجلاد الفعم