إحساس مغليك

عبدالله نهار الوتيد، وحضوره العذب من خلال «إحساس مغليك»، وشاعر جميل، قادر على ترك بصمة مميزة من خلال كل هذه المشاعر...!**

يحق لك يامعذب احساس مغليـك

يحق لك يابو العيـون الوسيعـة

الله يقدرنـي وأحـاول أداريــك

وأحفظك مثل اللي يحفظ الوديعـة

انا بحرت وسارح(ن) في شواطيك

يوم(ن) عشقتك مانويت الخديعـة

أذوب لامنـي سرحـت بحكاويـك

يازين هرجك غالي(ن) لو تبيعـه

الله يعين القلب يوم ابتلـى فيـك

زينك بلى مكياج... زينك طبيعـه

وانا عليك أحن وأدعي وأحاتيـك

العين في مثلـك تجيكـم سريعـه

يحق لك هالروض ينطر خطاويـك

ومن خطوتك هالروض ينبت ربيعه

يحق لك هالناس تعشق غناويـك

اللي تحبه صـار كـل(ن) يذيعـه

يحق لك لو قلت وشلـون مغليـك

ابيات صاغت لك معاني رفيعه

يحق لك لو قلت محد(ن) يساويك

من يخسرك ضاقت عليه الوسيعة

انا عشقتك قبل لا أعرف مباديـك

كله سبايب قلـب صرنـا نطيعـه

يحق لك يامعذب أحساس مغليـك

يحق لك يابو العيـون الوسيعـه



الشاعر / عبدالله نهــار الـوتيـد

aLwatted@