يا مستريح

بكل عناوين الشعر ولغة الشعر وحروفه الشامخة وبيوته الهادفة جاء الشاعر والإعلامي نايف بندر العتيبي بهذه القصيدة الرائعة ليصافحكم:

يا مستريح من العنا كيف تشكيه

وانت اكبر همومك غلا من توده

ريّح ضميرك ريّحه لاتعنيه

والشوف لهموم المخاليق لده

احد ٍ يجيه الهم كنّه يساويه

واحد يمر الهم ماهو بقده

واحد ٍ معاه الهم كنّه مخاويه

يطوي معاه سنينه المجرهده

واحد ٍ تقول الهم كنه يسليه

يطري عليه ان ناش راسه مخده

والهم واحد لا تحيّر باساميه

ياعايش ٍ جزره ولا عشت مده

ولو نكتفي بهموم غالي وغاليه

ما جابت الايام مالا نعده

والحظ مايستقبل الا عوانيه

والباب في وجه البعيدين سده

هذا ولد عمه وهذا مواليه

متقاسمين الناس مزحه وجده

واهل الزمن لو يكثرون المشاريه

باحت سدود الخلق ما باح سده

وانا احمد الله قانعٍ به وراضيه

مقسوم والمقسوم محد ٍ يرده

واللي كتب لك لازم انك تلاقيه

امر الولي المعبود ماعنه صده

يا مستريح ان كان تقدر تخليه

هم ٍ تقول انه وصل معك حده

قلي وش اللي يمكن انه يسويه

اللي بنى له حلم وازرى يهده

تلعب رداة الحظ باحلامه وفيه

وش عاد باقي له والاحلام ضده



شعر: نايف بندر العتيبي