غيّروك ياقلبي ..!!

بين الفراق ولوعة البعد وكلام العواذيل جاء هذا النص الرائع بحس ومشاعر مشاري العنزي فأهلاً وسهلاً



حسبي الله من تعمّد في جفاه

قلبي اللي من سبب هجرهْ ينوح  

ودّي انسى مير قلبي مانساه 

عارفٍ قلبي على الذكرى لحوح  

ماتصدق كلّ هذا ما كفاه 

حتى وصلهْ بالحلم خلّي شحوح  

ولوّ طيفهْ مرةٍ بيّن حلاه 

ما هو شوقٍ جا يملّحْها الجروح  

آه وا ويلاه خلّي يا قساه

ما درى وسط الحنايا لهْ صروح  

غيّروه الناس وابعدْ في خطاه 

مهرتي عن سكّتي صارت جموح  

بالمكان اللي يعانقني هواه 

صرت انادي اسمهْ بصوتٍ بحوح  

آتلفّت ما معي الاّ مناه 

ارتجي علّ وعسى زوله يلوح  

صرت اسولف للسحايب عن غلاه 

يوم رجلي عانقتْ هام السفوح  

قلبي بير وكاشفٍ عنّه غطاه 

يوم فارقني وانا هجسي يبوح  

من ورا زحمة شقاوي محتواه

ماتت آمال الهواوي والطموح  

ربي عين المبتلي عمّى بلاه 

كنت احسب السالفه كانت مزوح  

في غيابهْ كل صباحاتي مساه 

اسهرهْ ماشفت من شمسهْ وضوح  

كلمةٍ مسجونةٍ خلف الشفاه 

خبّروه انّي على وصلهْ نصوح  

يلعن الشيطان ويجدد ولاه 

ويدمج الجثمان مثل اول بروح 

وانْ تمادى في عناي وفي جفاه

والله انسى صاحب الوجه السموح 

واقطعْ الشريان من قلبٍ طراه

واترك الدمّان من صدري نضوح  

حسبي الله من تعمّد في شقاه 

قلبي اللي كل مساحاتهْ جروح 



شعر: مشاري بن فالح العنزي