العيـد

العيد فرحة ولكن هناك من يمره العيد وهو بعيد عن من يحب وبهذا النص الرائع الشمري يخاطب العيد بهذة العبارات.



كثر التوجّد للمحبّين غربال

يضغط على جرح الفؤاد ويزيده

والطاري اللي ما تردِّه عن البال

يرجع على الشوق القديم ويعيده

يا مرحبا يا عيد وشلون الأحوال

عساك مرَّيت البلاد البعيده

الديرة اللي دونها إرجال وأميال

يا عيد فيها فاقدن لي فقيده

أرسلت لي مرسال من بعد مرسال

ولافيهم اللي جاب حاجه جديده

أعذارهم صعبه وأنا حالتي حال

يا عيد لي يمنى ولكن وحيده

عندي ثقه في نفسي ولابس عقال

لكن متى يصحى ضمير الوليده

إن كان ذنبي ويش هو ذنب الأطفال

حتى بيوم العيد ماهي سعيده

من هو يلوم العين اذا دمعها سال

ومن دمعها ياليتها مستفيده

يا عيد لي ربٍّ إذا قال فعّال

سبحانه اللي ما يضيّع عبيده

ومن قال أنا اللي للصعيبات حلال

هذا الذي عنده خلل بالعقيده



شعر: نمـش الشمـري