علامك جرحتي

توني شعرت بقيمتك يوم تقفين

بأن التعب في خاطري يوم رحتي

أتخيلك من يوم رحتي تنادين

واهيمبك وقت الوفا لا فرحتي

حتى القلم في غيبتك صار مسكين

عجز يواسي خاطري يوم رحتي

كنت أعشقك عشق الفقر للمساكين

صدري بحر وانتي بصدري طفحتي

يامهلمتني لية عني تصدين؟

وانتي على عوج الحنايا مرحتي

كنت أحسبك لأكبر جروحي تشافين

واثرك على جرح المشاعر ملحتي

يا شمعة احساسي علامك تذوبين

يا دمعتين الشوق معقول سحتي

راهنت بك يوم الوفا بالعناوين

والظاهر انك في رهانك ربحتي

كنت اتصل ولا طرالك تردين

يمكن على كثر المشاغل سرحتي

جمعت لك صدق المشاعر دواوين

وانتي على جمع المشاعر طرحتي

ابسألك بالله من يوم تقفين

يا كيف قلبك طاوعك لا فرحتي

إن كان ما تدرين يا ليت تدرين

مكتوب تحت اسمك علامك جرحتي

أنا احتريتك في غيابي تدقين

وانتي على كل الرسايل مسحتي

حسيبك الله يا مسى يوم الاثنين

ليتك مع يوم الثلاثاء وضحتي

أبي طلب مادام ودك تروحين

أبيك باحساسك معي لو سمحتي

لونك على قلبي ثواني تطلين

ما كان قلبك طاوعك يوم رحتي



طلال روضان الشمري