عطايا الله

(البل) عمار الأرض مع طول الأجيال

سفن الصحاري طيبات المجاني

كنز الغناه ومكسب الوقت والحال

مقدارها موجود بين المحاني

الله ذكرها في مواضيع وأقوال

بالغاشية فيها دليل ومعاني

وتبقى الابل هي الفخر عند الأبطال

يشهد لها التاريخ فأول وثاني

الشامخات اللي على البيد تختال

ما كنّها إلا من كبار المباني

تسرح وهي زرفال وتعود زرفال

ومقامها شامخ بطول الزماني

طوال اللحى ورقابها دايم أطوال

عراض الخدود اللي هواها خذاني

ذات السنام اللي مع العرض لازال

فاخر ظهرها للأوادم يباني

وساع النحور وقدرها خير منزال

نرخص لها الغالي لو إنّا نعاني

نحبها ونعزها قدر وإجلال

ومنهو ملكها يرتفع بالمكاني

هي مكسب الدنيا وهي راس الأموال

تملكوها قبل فوت الأواني



سعود الجشعمي