المصري أفندي / تاريخ للبيع..!!
| د. سعيد فهمي* |
سبحان مغير الأحوال.. صدق اللي قال لكل زمان دولة ورجال.. وعشنا وشفنا الانصاص صحيت من قبورها لما الزمن عفى عليها ومال.. والكل كبر ماشاء الله وطلع له أنياب بعد ماكان بيرضع الببرونة وينام بدري زي العيال.. وشفنا ثورة ماشاء الله وشفافية وهوجة قال يعني حرية ولسان طويل بعد ما كان مقصوص وملجوم اتلفع بيه الكل وصال وجال.. وراحوا يكتبوا التاريخ من جديد بحبر لون تاني لزوم النيولوك وعمليات شد الذمة والضمير والمقاييس الجديدة للجمال.. كل ده علشان الله يلعنه التوريث اللي كان عاوز يكوينا بالمحروس اللي اسمه جمال.. سبحان الله الحال اتبدل والدنيا اتشقلبت والتعريفات غيرناها وخلاص لا بقى فيه لأي واحد هيبة أو اجلال.. وبقينا نحكم على الناس بخبر صغير عالنت أو من موقع مشبوه أو فلان قال.. ياعيني عليك يازمن لما تخلينا نعيش ونشوف قتلة ومحرضين يستقبلوهم بالورود زي الفاتحين الأبطال.. ياعيني عالتاريخ لما يبدلوه ويكتبوه ويحكموا فيه عالناس حسب القيل والقال.. معقول يبقى الشاهد على العصر شيطان أخرس أو صاحب قلم مقصوف كان بيبوس الأيادي وفاكر نفسه بيحرر القنال.. معقول كده قدام عينينا نلاقي أي واحد يشخبط في السطور ويصنف الناس ده وطني وده من الخونة الأندال.. تزييف التاريخ ومحاولة تشويه الناس وتصنيفهم شيء غير مقبول ومُحال.. التاريخ لازم نذكر فيه كل الأحداث حلوها ومرها لأنه تراث لينا وملك للأجيال.. أصحاب كتب التاريخ في وزارة التربية لازم يراعوا ربنا في كل واحد شال كفنه على ايديه ودافع عن البلد دي يوم أو دمه سال.. التاريخ لازم نكتبه بواقعية مش بكلمات عاطفية مليانة خيال.. انكار التاريخ شيء عمره قصير وضعيف صعب نمحي بصمات الرجال.. اللي عاوز يختصر التاريخ أكيد غبي زي اللي بيكتب ذكرياته على موج البحر أو شط رمال.. ياصاحب الأمر أكتب التاريخ زي ما هو لأنه ارضاء وتحقيق رغبات الجميع شيء مستحيل وصعب المنال..!!
سمعنا عن لجنة تبديل المناهج انها حتزيل اسم الرئيس السابق من كتب التاريخ ويحذفوه.. لقيت مخي رجع بالزمان من جديد وافتكرت الكتب اللي درستها من غير اسم الرئيس نجيب اللي راحوا بأستيكة ومسحوه.. ودوره في قيام الثورة عرفناه من بره لأن المسؤولين عن تدوين كتب المدارس ببساطة راحوا ونسيوه.. وكل دور قام بيه من غير أي تأنيب للضمير أنكروه.. وقبوله لقيادة مجلس الثورة وتحديه للارادة الملكية في انتخابات نادي الضباط ببساطة طنشوه.. ولما كان رأي أصحاب الأمر ساعتها باقالته لقينا الاعلاميين والمؤرخين في لحظة باعوه.. مع ان الكل كان شاهد على وجوده على رأس القيادة والكل ساعتها شافوه.. لكن كتب التاريخ أنكرت تاريخه وحتى وجوده في الدنيا أصلا نسيوه.. وراحوا من غير محاكمة وعلى بيته في المرج حددوا اقامته ونفوه.. ومنعوا عنه الميه والهوا وخنقوا حريته وهو حي يرزق اغتالوه.. ولا طلع مدون للتاريخ عنده ضمير سجل في كتب التاريخ انه رئيس ولا حتى على استحياء ذكروه.. تصدق ان رئيس ثورة يموت كده فطيس حتى الجنازة الرسمية منها حرموه.. وبعد كل ده وببساطه راحوا يغيروا كتب التاريخ من جديد واسمه كرئيس من جديد رجعوه.. بالذمة عقليه بالشكل ده ازاي الناس يصدقوه.. وزي النحاس باشا زعيم الوفد والأمة مات في جنازة سرية والشعب من العزاء منعوه.. وراحوا واختصروا اسمه من كتب التاريخ هو وغيره وكتبوا بس اللي عاوزين الناس يعرفوه.. معقولة نكتب تاريخنا بطريقة على حسب وداد قلبي وعلى مزاج ناس عاوزة ترضي ناس بعينها على اللي بيكتبوه.. ياريت اللي بيكتبوا التاريخ يراعوا ربنا في أجيالنا ويسجلوا كل شيء علشان ولادنا يدرسوه.. سيبوا ضميرنا يقرأ ويحكم والحكم للشعب بس لازم كل شيء عاشوه أجدادنا وعشناه تكتبوه.. الشعب واعي وفاهم وعارف مين اللي دافع عن البلد وقضيته ومين اللي خانوه.. عارف مين اللي طبل وزمر وهلل لأي نظام وغيروا الذمم والضمائر وعملوا أراجوزات علشان يرضوه.. كلنا شاهدين على مسؤول أو اعلامي ركب الموجة والمنصة حتى جماعات الائتلاف راحوا على غفلة وليهم ضموه.. حتى الجماعات الدينية نسبت ليها فضل الثورة والمعارضة للنظام رغم أنهم كانوا رقم في معادلة الحكم والمجلس بالتدليس قسموه.. الأمثلة كتير قدامنا لكن كفاية عليهم كده وكلامنا ياريت يفهموه..!!
باختصار اكتبوا التاريخ بأمانة وسيبوا للناس الحكم والتفسير.. اكتبوا كل حاجة من غير مجاملة أو اجحاف لوزير أو حتى غفير.. احترموا عقول الناس واكتبوا الحقيقة من غير مجاملة أو تزوير.. كتابة التاريخ بمراهقة وانفعال شيء بشع ومجحف ومرير.. التاريخ لازم تكتبوه بضمير من غير حسابات أو دفع فواتير.. خدوا بالكم الناس مش زي زمان وصعب يرجعوا من تاني ويلبسوا طراطير..!!
الخلاصة أي مدون بيغير في التاريخ انسان غبي وضعيف.. وتغيير الأحداث والأشخاص لعبة قديمة مرعبة وأسلوب رخيص وسخيف.. صعب نكتب التاريخ بمزاج مرحلة معينة أو طمعا في منصب أو حتى رغيف.. اللي ينكر بصمات أي حد في أي عصر انسان غير أمين وكمان أعمى وكفيف.. عاوزين نعرف كل الأحداث من غير رتوش عاوزين نعرف مين اللي بيسرق ثورتنا ومين اللي عامل فيها شريف.. بالذمة ايه الفرق بين اللي بيكتب التاريخ بمزاجه واللى عمله في اقتصادنا عز أو اللي أفسده في حياتنا السياسية مستر صفوت الشريف.. المهم مانرجعش زي زمان ويارب تجعل كلامنا عليهم مهضوم وخفيف..!!
[email protected]
سبحان مغير الأحوال.. صدق اللي قال لكل زمان دولة ورجال.. وعشنا وشفنا الانصاص صحيت من قبورها لما الزمن عفى عليها ومال.. والكل كبر ماشاء الله وطلع له أنياب بعد ماكان بيرضع الببرونة وينام بدري زي العيال.. وشفنا ثورة ماشاء الله وشفافية وهوجة قال يعني حرية ولسان طويل بعد ما كان مقصوص وملجوم اتلفع بيه الكل وصال وجال.. وراحوا يكتبوا التاريخ من جديد بحبر لون تاني لزوم النيولوك وعمليات شد الذمة والضمير والمقاييس الجديدة للجمال.. كل ده علشان الله يلعنه التوريث اللي كان عاوز يكوينا بالمحروس اللي اسمه جمال.. سبحان الله الحال اتبدل والدنيا اتشقلبت والتعريفات غيرناها وخلاص لا بقى فيه لأي واحد هيبة أو اجلال.. وبقينا نحكم على الناس بخبر صغير عالنت أو من موقع مشبوه أو فلان قال.. ياعيني عليك يازمن لما تخلينا نعيش ونشوف قتلة ومحرضين يستقبلوهم بالورود زي الفاتحين الأبطال.. ياعيني عالتاريخ لما يبدلوه ويكتبوه ويحكموا فيه عالناس حسب القيل والقال.. معقول يبقى الشاهد على العصر شيطان أخرس أو صاحب قلم مقصوف كان بيبوس الأيادي وفاكر نفسه بيحرر القنال.. معقول كده قدام عينينا نلاقي أي واحد يشخبط في السطور ويصنف الناس ده وطني وده من الخونة الأندال.. تزييف التاريخ ومحاولة تشويه الناس وتصنيفهم شيء غير مقبول ومُحال.. التاريخ لازم نذكر فيه كل الأحداث حلوها ومرها لأنه تراث لينا وملك للأجيال.. أصحاب كتب التاريخ في وزارة التربية لازم يراعوا ربنا في كل واحد شال كفنه على ايديه ودافع عن البلد دي يوم أو دمه سال.. التاريخ لازم نكتبه بواقعية مش بكلمات عاطفية مليانة خيال.. انكار التاريخ شيء عمره قصير وضعيف صعب نمحي بصمات الرجال.. اللي عاوز يختصر التاريخ أكيد غبي زي اللي بيكتب ذكرياته على موج البحر أو شط رمال.. ياصاحب الأمر أكتب التاريخ زي ما هو لأنه ارضاء وتحقيق رغبات الجميع شيء مستحيل وصعب المنال..!!
سمعنا عن لجنة تبديل المناهج انها حتزيل اسم الرئيس السابق من كتب التاريخ ويحذفوه.. لقيت مخي رجع بالزمان من جديد وافتكرت الكتب اللي درستها من غير اسم الرئيس نجيب اللي راحوا بأستيكة ومسحوه.. ودوره في قيام الثورة عرفناه من بره لأن المسؤولين عن تدوين كتب المدارس ببساطة راحوا ونسيوه.. وكل دور قام بيه من غير أي تأنيب للضمير أنكروه.. وقبوله لقيادة مجلس الثورة وتحديه للارادة الملكية في انتخابات نادي الضباط ببساطة طنشوه.. ولما كان رأي أصحاب الأمر ساعتها باقالته لقينا الاعلاميين والمؤرخين في لحظة باعوه.. مع ان الكل كان شاهد على وجوده على رأس القيادة والكل ساعتها شافوه.. لكن كتب التاريخ أنكرت تاريخه وحتى وجوده في الدنيا أصلا نسيوه.. وراحوا من غير محاكمة وعلى بيته في المرج حددوا اقامته ونفوه.. ومنعوا عنه الميه والهوا وخنقوا حريته وهو حي يرزق اغتالوه.. ولا طلع مدون للتاريخ عنده ضمير سجل في كتب التاريخ انه رئيس ولا حتى على استحياء ذكروه.. تصدق ان رئيس ثورة يموت كده فطيس حتى الجنازة الرسمية منها حرموه.. وبعد كل ده وببساطه راحوا يغيروا كتب التاريخ من جديد واسمه كرئيس من جديد رجعوه.. بالذمة عقليه بالشكل ده ازاي الناس يصدقوه.. وزي النحاس باشا زعيم الوفد والأمة مات في جنازة سرية والشعب من العزاء منعوه.. وراحوا واختصروا اسمه من كتب التاريخ هو وغيره وكتبوا بس اللي عاوزين الناس يعرفوه.. معقولة نكتب تاريخنا بطريقة على حسب وداد قلبي وعلى مزاج ناس عاوزة ترضي ناس بعينها على اللي بيكتبوه.. ياريت اللي بيكتبوا التاريخ يراعوا ربنا في أجيالنا ويسجلوا كل شيء علشان ولادنا يدرسوه.. سيبوا ضميرنا يقرأ ويحكم والحكم للشعب بس لازم كل شيء عاشوه أجدادنا وعشناه تكتبوه.. الشعب واعي وفاهم وعارف مين اللي دافع عن البلد وقضيته ومين اللي خانوه.. عارف مين اللي طبل وزمر وهلل لأي نظام وغيروا الذمم والضمائر وعملوا أراجوزات علشان يرضوه.. كلنا شاهدين على مسؤول أو اعلامي ركب الموجة والمنصة حتى جماعات الائتلاف راحوا على غفلة وليهم ضموه.. حتى الجماعات الدينية نسبت ليها فضل الثورة والمعارضة للنظام رغم أنهم كانوا رقم في معادلة الحكم والمجلس بالتدليس قسموه.. الأمثلة كتير قدامنا لكن كفاية عليهم كده وكلامنا ياريت يفهموه..!!
باختصار اكتبوا التاريخ بأمانة وسيبوا للناس الحكم والتفسير.. اكتبوا كل حاجة من غير مجاملة أو اجحاف لوزير أو حتى غفير.. احترموا عقول الناس واكتبوا الحقيقة من غير مجاملة أو تزوير.. كتابة التاريخ بمراهقة وانفعال شيء بشع ومجحف ومرير.. التاريخ لازم تكتبوه بضمير من غير حسابات أو دفع فواتير.. خدوا بالكم الناس مش زي زمان وصعب يرجعوا من تاني ويلبسوا طراطير..!!
الخلاصة أي مدون بيغير في التاريخ انسان غبي وضعيف.. وتغيير الأحداث والأشخاص لعبة قديمة مرعبة وأسلوب رخيص وسخيف.. صعب نكتب التاريخ بمزاج مرحلة معينة أو طمعا في منصب أو حتى رغيف.. اللي ينكر بصمات أي حد في أي عصر انسان غير أمين وكمان أعمى وكفيف.. عاوزين نعرف كل الأحداث من غير رتوش عاوزين نعرف مين اللي بيسرق ثورتنا ومين اللي عامل فيها شريف.. بالذمة ايه الفرق بين اللي بيكتب التاريخ بمزاجه واللى عمله في اقتصادنا عز أو اللي أفسده في حياتنا السياسية مستر صفوت الشريف.. المهم مانرجعش زي زمان ويارب تجعل كلامنا عليهم مهضوم وخفيف..!!
[email protected]
