عطر الحزن...!

الشاعر العذب فيصل الحلبوص، وكل هذه الخصوصية والتميز، وباقة فارهة من المشاعر والشعر والهدايا والأعياد، كل هذا لا يجيد صياغته بهذا الحب سوى شاعر يحمل قلب فيصل الحلبوص...!

ماني بليد بشعوري أعرف أحوالك!

لو ما تكلمت! يفضك صمتك جفونك

أفهمك قبل الكلام يكون في بالك

وأعيش وياك كل لحظة ولا أخونك

ابني لك آمال لو تتحطم آمالك

وأكون غصنك إذا تتكسر غصونك

للحين باقي بـ شقاتي طعم فنجالك

بللت ريقي حبيبي بـ قهوة جنونك

أنا احتسيت الوفا من وبل همالك

واعشوشب القلب لين اصبحت مجنونك

ليه المراكب حزينة راسية بـ جالك

احس حتى النوارس هم يبكونك

عطر الحزن دمع يتساقط على شالك

امسح دموعك أنا ما أخيب ظنونك

لو يستحي الحزن ما مرك ولا جالك؟

ولا يخلي الدموع تبلل عيونك!