وقت الأصيل

كل ما تارد هجوسي مع الليل الطويل

انت مدري ويش علمك على بالي طريت؟

حي كل طاري يجيبك وحيه من خليل

باقية ذكراك في عالمي مهما حييت

بيني وبينك مواثيق يالطرف الكحيل

الغلا والود والشوق لك مهما حكيت

انت تدري مثل مادري ولا تبغى دليل

شوفني يضمى كياني ليامني رويت؟!

انت مالك بالحلا لا شبيه ولا مثيل

القمر لاشع بالضي يا نجمة طفيت

في وصالك مثل شوف الحيا قلبي عليل

ينشرح صدري اذا شافتك عيني لفيت

في غيابك ليل موحش عقب وقت الأصيل

كن ما فيها حلا عقبكم ارض الكويت؟!

في محيط الفكر ما بين حط وبين شيل

انتهي من بيت وابدأ معك في سرد بيت





مناور بن هاجد