المصري أفندي / طيور الظلام.. !
| د. سعيد فهمي * |
فجأه وفي عز الضلمة هجم دراكولا علينا في صورة بابا نويل.. وراح يتسحب في خطوة جبانة واتسلل متخفي في جوف الليل.. كانت الناس فرحانة بالعام الجديد اللي كان بيصلي واللي كان فرحان بالعام الجديد وبيغني ياعيني ياليل.. كانت الناس في حالة بهجة وفرحة في أرض المحروسة هبة النيل.. لكن دراكولا كان له مخطط تاني ومصمم على قتل فرحة المصريين ونشر ثقافة البكاء والعويل.. كانت ليلة ولا أي ليلة شفنا فيها الغدر والجبن والناس داقت طعم الويل.. الكل شاف دراكولا بينهش في أمنهم وبيمص دمهم بالقنطار ويكيل الغدركيل.. مصر باتت حزينة وامتزج دم ولادها مسلم ومسيحي وكأن الموت كان على وحدتهم دليل.. !! أيادي الغدر الأثيمة بتحاول تسلب دايما من شعب المحروسة الأمان.. راحت وبثت سمومها وشفنا انفجارات وقتلى في كل مكان.. وبتفكير غير مسبوق قلبوا حال البلد بعمل إرهابي خسيس وجبان.. راحوا وخططوا بدقة واختاروا المكان والزمان.. وسرقوا الحياة والأمل والفرحة من كل واحد بيحتفل بالعام الجديد فرحان.. الناس كانت بسيطة وبتحتفل بطريقتها وفاكرة ياعيني إن الحياة جميلة والدنيا لسة أمان.. لكن ياخسارة كل واحد نال طعنة في قلبه خلت الكل بكى على حال البلد مقهور زعلان.. الكل اتأكد وبالدليل القاطع إن مصر هي المقصودة ودم المسلم والمسيحي عند الإرهاب سيان.. الله يجازي كل أيدي أثيمة بتشعلل الطائفية في بلدنا المحروسة اللي كرمها القرآن.. لكن محروسة يامصر من كل شر ومهما خطط دراكولا أو حتى إبليس أو أي كائن كان.. محروسة يابلدي من كل شر بوحدة ولادك مرقص وحسين وأحمد ودميان.. محروسة يامصر وحتعيشي دايما دار أمن زي ماوصفك في كتابه الرحمن.. !! قلنا من زمان ونادينا إن بلدنا عليها العين ومن كل الشياطين مرصودة.. عاوزينها دايما متكعبلة ومشغولة بمشاكل بتتفصل عليها مقصودة.. وعلشان هي محور العالم بتلاقي الأعادي كتير وكل أيادي الغدر عليها ممدودة.. علشان لو صحيت وفاقت حتلاقي كل سهام الحقد على أصحابها مردودة.. بلد الأمن والأمان والشعب الواحد المسلم والمسيحي إلى يوم الدين يد واحد متشابكة ومربوطة.. المسلم والمسيحي كيان ونسيج واحد بكيمياء خاصة ومضبوطة.. صدقوني مهما اتنكر دراكولا أو إبليس في صورة بابا نويل أو تنظيم قاعدة أيامه في بلدنا معدودة.. !! اللي حصل في بلدنا كان مثار غضب واحتقان كل المواطنين.. والضربة كانت في القلب للجميع مسلمين ومسيحيين.. وده كان واضح وظاهر في نبرة بيان الرئاسة الصارم الحزين.. الهدف مش مسلم أو مسيحي الهدف كان كل المصريين.. !! الديابة حوالينا كتير في صورة قاعدة أو أحلام فارسية أو تعابين صهيون.. والأفاعي ليها ألف رأس ورأس بتطل علينا بالخراب والطائفية والجنون.. ومهما حاولوا لا يمكن حيدنس أرضنا حاقد أومجنون.. بلدنا اسمها المحروسة وحتفضل بإذن الله محروسة مهما اللي يحصل يكون.. !! مكتوب علينا نكون كبار ونتصدى لكل الألاعيب والمخططات الصهيونية.. مكتوب علينا نكون أم الدنيا ونقف بالمرصاد لكل الأحلام الفارسية.. مكتوب علينا نكون رمانة الميزان والكل يشتاق لمكانتنا التاريخية.. مكتوب علينا تتجمع التعابين حوالينا وبالدسائس يحاولوا يمنعوا النيل عن شعب بهية.. مكتوب علينا يقسموا البلاد حوالينا ويلهونا بالمخططات الإرهابية.. مكتوب علينا وده قدرنا ومن آلاف السنين مكتوب في كل الكتب السماوية.. قالها الرحمن في كتابه الكريم «ادخلوا مصر إن شاء الله آمنين» وهو ده سر الحاقدين علينا بالقصد والنية.. !! لكن ده درس ولازم نتعلمه ولازم نحل مشاكلنا بصراحة وبلاش أسلوب النعام.. مش لازم نستني مصيبة ونصحى ونفوق وبعدين كل جبهة تلبد في الدرة للتاني وتنام.. لازم نعالج القضايا بوضوح ونفتح قلوبنا ونصد باب الفتنة وألاعيب اللئام.. لازم الحل يكون من عندنا وجوانا ولازم نمسك بإيدينا الزمام.. عاوزين حلول عملية لكل قضايانا بالفعل مش بالأحضان والكلام.. مصر أمانة في رقبتنا كلنا مسؤولين ومواطنين ومن حقنا كلنا مسلم ومسيحي نعيش في محبة ووئام.. البلد دي بلدنا كلنا ومسجلين مصريين بأسماء محمد وبطرس وعمر وهشام.. بالحق والعدل والتكاتف حنحقق الوحدة والكل حيعيش في سلام.. !! الوطن ده وطننا كلنا مش بتاع أي حد.. الوطن ده وطن كل المصريين مسلم ومسيحي لغاية ألف جد.. لازم نزيل أسباب الاحتقان بصراحة وصرامة ونحط ليها حد.. لاعاد ينفع حل المشاكل بالشعارات ويحيا الهلال مع الصليب وبوسة على الراس والخد.. معالجة الأمور بسطحية ورعونة خلي بركان الطائفية يزيد ويمتد.. ترقيع الحلول والطبطبة والطناش وتأجيل مناقشة مشاكلنا خلي الأمور تحتد.. خلاص دقت ساعة العمل وخلاص آن الأوان نعيد النسيج من جديد وبمنتهى الجد.. تأجيل الحلول بينخر في جذور الأمة ولو خربت النوايا والنفوس حنلاقي الأساس انهد.. !! الخلاصة الحل بإيدينا ومهما حصل حيفضل ولادك يامصر في رباط إلى يوم الدين.. وبعقول قياداتنا في المسجد والكنيسة حنتجاوز مصيبتنا وحنفضل مترابطين.. وبحكمة أصحاب القرار حنعالج الأسباب ونحرق دم الشامتين.. وحتفضل مصر أم الدنيا ويد واحدة رغم أنف وكل غل الحاقدين.. وحيعيش الهلال مع الصليب نسيج واحد وحيسطروا أسطورة محفوظة بحرص كل المصريين.. إحنا بلد الوحدة والمحبة والسلام ولا قدر يفرقنا أي مستعمر أو متربص مهما كان مين.. ومهما كانت ضربة الغدر حنقدر عليها بإذن الله لأن دي مصر أم الدنيا وبلد الأزهر وعيسى وموسى وكل المؤمنين.. القرآن قال كده وأثبتها التاريخ وكلنا ومهما كانت مذاهبنا لازم نقر ونعترف ونصلي ونقول آمييييييين.. !! الخلاصة لازم نقطع رأس الأفعى زي ماقال ريسنا ونحارب طيور الظلام.. ونعيد ترتيب البيت من جديد بالمحبة والوئام.. اللهم قد بلغت اللهم فاشهد وخلاص خلص الكلام.. !!
said_elmasryfahmy@hotmail.com
فجأه وفي عز الضلمة هجم دراكولا علينا في صورة بابا نويل.. وراح يتسحب في خطوة جبانة واتسلل متخفي في جوف الليل.. كانت الناس فرحانة بالعام الجديد اللي كان بيصلي واللي كان فرحان بالعام الجديد وبيغني ياعيني ياليل.. كانت الناس في حالة بهجة وفرحة في أرض المحروسة هبة النيل.. لكن دراكولا كان له مخطط تاني ومصمم على قتل فرحة المصريين ونشر ثقافة البكاء والعويل.. كانت ليلة ولا أي ليلة شفنا فيها الغدر والجبن والناس داقت طعم الويل.. الكل شاف دراكولا بينهش في أمنهم وبيمص دمهم بالقنطار ويكيل الغدركيل.. مصر باتت حزينة وامتزج دم ولادها مسلم ومسيحي وكأن الموت كان على وحدتهم دليل.. !! أيادي الغدر الأثيمة بتحاول تسلب دايما من شعب المحروسة الأمان.. راحت وبثت سمومها وشفنا انفجارات وقتلى في كل مكان.. وبتفكير غير مسبوق قلبوا حال البلد بعمل إرهابي خسيس وجبان.. راحوا وخططوا بدقة واختاروا المكان والزمان.. وسرقوا الحياة والأمل والفرحة من كل واحد بيحتفل بالعام الجديد فرحان.. الناس كانت بسيطة وبتحتفل بطريقتها وفاكرة ياعيني إن الحياة جميلة والدنيا لسة أمان.. لكن ياخسارة كل واحد نال طعنة في قلبه خلت الكل بكى على حال البلد مقهور زعلان.. الكل اتأكد وبالدليل القاطع إن مصر هي المقصودة ودم المسلم والمسيحي عند الإرهاب سيان.. الله يجازي كل أيدي أثيمة بتشعلل الطائفية في بلدنا المحروسة اللي كرمها القرآن.. لكن محروسة يامصر من كل شر ومهما خطط دراكولا أو حتى إبليس أو أي كائن كان.. محروسة يابلدي من كل شر بوحدة ولادك مرقص وحسين وأحمد ودميان.. محروسة يامصر وحتعيشي دايما دار أمن زي ماوصفك في كتابه الرحمن.. !! قلنا من زمان ونادينا إن بلدنا عليها العين ومن كل الشياطين مرصودة.. عاوزينها دايما متكعبلة ومشغولة بمشاكل بتتفصل عليها مقصودة.. وعلشان هي محور العالم بتلاقي الأعادي كتير وكل أيادي الغدر عليها ممدودة.. علشان لو صحيت وفاقت حتلاقي كل سهام الحقد على أصحابها مردودة.. بلد الأمن والأمان والشعب الواحد المسلم والمسيحي إلى يوم الدين يد واحد متشابكة ومربوطة.. المسلم والمسيحي كيان ونسيج واحد بكيمياء خاصة ومضبوطة.. صدقوني مهما اتنكر دراكولا أو إبليس في صورة بابا نويل أو تنظيم قاعدة أيامه في بلدنا معدودة.. !! اللي حصل في بلدنا كان مثار غضب واحتقان كل المواطنين.. والضربة كانت في القلب للجميع مسلمين ومسيحيين.. وده كان واضح وظاهر في نبرة بيان الرئاسة الصارم الحزين.. الهدف مش مسلم أو مسيحي الهدف كان كل المصريين.. !! الديابة حوالينا كتير في صورة قاعدة أو أحلام فارسية أو تعابين صهيون.. والأفاعي ليها ألف رأس ورأس بتطل علينا بالخراب والطائفية والجنون.. ومهما حاولوا لا يمكن حيدنس أرضنا حاقد أومجنون.. بلدنا اسمها المحروسة وحتفضل بإذن الله محروسة مهما اللي يحصل يكون.. !! مكتوب علينا نكون كبار ونتصدى لكل الألاعيب والمخططات الصهيونية.. مكتوب علينا نكون أم الدنيا ونقف بالمرصاد لكل الأحلام الفارسية.. مكتوب علينا نكون رمانة الميزان والكل يشتاق لمكانتنا التاريخية.. مكتوب علينا تتجمع التعابين حوالينا وبالدسائس يحاولوا يمنعوا النيل عن شعب بهية.. مكتوب علينا يقسموا البلاد حوالينا ويلهونا بالمخططات الإرهابية.. مكتوب علينا وده قدرنا ومن آلاف السنين مكتوب في كل الكتب السماوية.. قالها الرحمن في كتابه الكريم «ادخلوا مصر إن شاء الله آمنين» وهو ده سر الحاقدين علينا بالقصد والنية.. !! لكن ده درس ولازم نتعلمه ولازم نحل مشاكلنا بصراحة وبلاش أسلوب النعام.. مش لازم نستني مصيبة ونصحى ونفوق وبعدين كل جبهة تلبد في الدرة للتاني وتنام.. لازم نعالج القضايا بوضوح ونفتح قلوبنا ونصد باب الفتنة وألاعيب اللئام.. لازم الحل يكون من عندنا وجوانا ولازم نمسك بإيدينا الزمام.. عاوزين حلول عملية لكل قضايانا بالفعل مش بالأحضان والكلام.. مصر أمانة في رقبتنا كلنا مسؤولين ومواطنين ومن حقنا كلنا مسلم ومسيحي نعيش في محبة ووئام.. البلد دي بلدنا كلنا ومسجلين مصريين بأسماء محمد وبطرس وعمر وهشام.. بالحق والعدل والتكاتف حنحقق الوحدة والكل حيعيش في سلام.. !! الوطن ده وطننا كلنا مش بتاع أي حد.. الوطن ده وطن كل المصريين مسلم ومسيحي لغاية ألف جد.. لازم نزيل أسباب الاحتقان بصراحة وصرامة ونحط ليها حد.. لاعاد ينفع حل المشاكل بالشعارات ويحيا الهلال مع الصليب وبوسة على الراس والخد.. معالجة الأمور بسطحية ورعونة خلي بركان الطائفية يزيد ويمتد.. ترقيع الحلول والطبطبة والطناش وتأجيل مناقشة مشاكلنا خلي الأمور تحتد.. خلاص دقت ساعة العمل وخلاص آن الأوان نعيد النسيج من جديد وبمنتهى الجد.. تأجيل الحلول بينخر في جذور الأمة ولو خربت النوايا والنفوس حنلاقي الأساس انهد.. !! الخلاصة الحل بإيدينا ومهما حصل حيفضل ولادك يامصر في رباط إلى يوم الدين.. وبعقول قياداتنا في المسجد والكنيسة حنتجاوز مصيبتنا وحنفضل مترابطين.. وبحكمة أصحاب القرار حنعالج الأسباب ونحرق دم الشامتين.. وحتفضل مصر أم الدنيا ويد واحدة رغم أنف وكل غل الحاقدين.. وحيعيش الهلال مع الصليب نسيج واحد وحيسطروا أسطورة محفوظة بحرص كل المصريين.. إحنا بلد الوحدة والمحبة والسلام ولا قدر يفرقنا أي مستعمر أو متربص مهما كان مين.. ومهما كانت ضربة الغدر حنقدر عليها بإذن الله لأن دي مصر أم الدنيا وبلد الأزهر وعيسى وموسى وكل المؤمنين.. القرآن قال كده وأثبتها التاريخ وكلنا ومهما كانت مذاهبنا لازم نقر ونعترف ونصلي ونقول آمييييييين.. !! الخلاصة لازم نقطع رأس الأفعى زي ماقال ريسنا ونحارب طيور الظلام.. ونعيد ترتيب البيت من جديد بالمحبة والوئام.. اللهم قد بلغت اللهم فاشهد وخلاص خلص الكلام.. !!
said_elmasryfahmy@hotmail.com
