«ما قصّر زماني»

يغيب ثم يأتي بالجميل والرائع انه حمد بن شريم يعاتب من؟ السهر ام الضيق ام النوح انهم ضيوفه رغم ثقلهم الا انه يعاملهم معاملة الضيف ولكن هذا الشيء متاح فالشعر فقط ومن خلال الشعر يستطيع الشاعر ان يطرق ما يشاء وبهذا الاسلوب يصافحكم حمد بهذه القصيدة الرائعة



أنا والسهر والضيق والنوح يا سعود

ثلاثت ضيوف وربّعو بالمحاني

يقولون يا بن شريم ما ودك بزود

وانا اقول ما قصّر زماني عطاني

وانا بذكر اللي قلت وعيوني شهود

يبان التعب لو ما تكلم الساني

وش اكثر من السهران والعالم رقود

تنام العيون ونومها ما هناني

وش اكثر مدام الجود بالضيق موجود

يمد العطا ويقول قرّب عشاني

وش اكثر مدام النوح لاهبّت النود

احس الهبوب اتقول نوحك دعاني

وانا ما علي اخلاف والسيف مجرود

اشيل الحمول ولا تعثر احصاني

عرفت الحياة وشفت ماشفت والعود

عطاني وعلمني وثبّت مكاني

كلامه يورّدني على الجود واجود

وفعله ينسيني بلاوي زماني

وانا متكل بالله ومطلاعي سنود

عساني أحقق ما نويته عساني

ترى الرجل لاجنّب عن قليّل الفود

بقى ذكره الطيّب حديث الثواني

وانا بختصر ما قلت والوقت محدود

لو اكتب عن الخافي تضيق المعاني

ذكرت السهر والضيق والنوح يا سعود

ثلاثت ضيوف وربّعو بالمحاني



حمد بن شريم