المصري أفندي / آخر فرصة..!!
| د. سعيد فهمي |
وأخيراً صرح مصدر مهم قوي واللي عن الانتخابات مسؤول.. وياريته زي ما أعلن عن مواعيد الانتخابات كان فسّر أسباب زيادة أسعار الطماطم والفول.. وليه سايبين أسعار اللحمة والخضار واكلانا كده زي الغول.. الكل سُكتم بُكتم لا فيه احساس بالناس ولا أي همس أو قُول.. سيبك انت المهم انه أعلن عن موعد الترشيح وحنلاقي أصحابنا اياهم طبعا حيقدموا أوراقهم على طول.. ورغم الفضايح والبلاوي والأداء السلبي الفج المشلول.. أكيد حيقدموا أوراقهم بكل بجاحة وكأن الرأي الشعبي ضارب بانجو أو مسطول.. مش عارف معتمدين على ايه ياترى على حزب ولا الفتونة بمبدأ خلي اللي يقول يقول.. لكن ياترى مين اللي حيديهم صوته بنفسه أو يبعته رسالة عالمحمول.. ومين اللي حيقدر يكفينا شر الوجوه دي ويحقق المأمول.. باختصار كل واحد حر في البلد دي وهو عن مستقبله مسؤول.. كفانا بقى سلبية في مستقبلنا ونحاول نخلي صوتنا بالكبير موصول.. ويعرف اننا قررنا نغير سلوكنا ونشارك بصوتنا ونطوف بلدنا بالعرض والطول.. حنشارك بصوتنا ونبني بلدنا ونفضفض عن رأينا المحبوس في القلب ومغلول .. عزيزي الناخب شارك بصوتك لو سمحت لامتى حتفضل عبيط ودلدول..!! انتخابات مجلس الشعب اللي جاية مرحلة مهمة ومصيرية.. ولو فكرت فيها حتعرف ايه هو سر القضية.. لأنها بتورينا ايه اللي مستنينا في أيامنا اللي جاية.. وهي المراية وهي البداية وصورتنا بالألوان الطبيعية.. ياترى حنقدر نلون صورتنا وللا حنخليها أبيض وأسود هباب كده زي ما هي.. الألوان بتظهر لينا التفاصيل الدقيقة والكرمشة والبلاوي المستخبية.. الألوان بتفضح المستور وبتعمل زووم وبتكشف صورتنا الحقيقية.. يبقى أولى نبحلق عنينا ونراقب نوابنا ونحاول نطهر حياتنا النيابية.. النائب هو الرسول اللي بيوصل للمسؤولين أمانينا ومطالبنا المنسية.. النائب هو العنوان الحقيقي لوعي الناس والتعبير عن احساسهم بالمسؤولية.. قدامك طريقين ياتختار راجل محترم يعبر عن صوتك ياتعيش زي ما انت كده غرقان في القرع والملوخية.. صوتك أمانة أوعى تفرط فيه وبص لمستقبل وطنك مش لمصالحك الشخصية.. اياك تبيعه لأي واحد مهما كان ولو عمل لك البحر طحينة أو وعدك بتحقيق أمنية.. انت حُر في صوتك يا اما تتهنى بيه يا اما تلبس خازوق أو سُلطانية.. لكن قبل ما تفرط في صوتك افتكر بكره وكمان مستقبل ولادك وقبل منهم المحروسة بهية..!!
اياك وأوعى تتغر بحضرة المرشح اللي داخل بالحنجل والمنجل عليك.. عاوز ياكل مخك بالوعود عاوز يجرجر رجليك.. صوتك أمانة وغالي قوي أوعى يطير من بين ايديك.. لازم تحافظ على صوتك وتديه للي يستاهله وتحطه في عنيك.. صوتك لو تعرف قيمته حتعرف انه هو الشيء الوحيد الباقي في الدنيا ليك.. لو ضحكوا عليك وسرقوا صوتك يبقى العيب مش فيهم وأكيد حيكون فيك.. لو فرطت في صوتك أوعى تيجي وتشتكي من ظلم الحكومة وخليها بقى تربيك.. لو فرطت في صوتك ماتطالبش باصلاح بعد كده وروح ادّن في مالطة زي الفرخة من غير ديك..!!
اياك تاكل الأونطة من مرشحين تلاقيهم داخلين عليك بأفكار ملطوشة.. يعشموك بالأحلام وكل وعودهم وهمية ومغشوشة.. واللي منهم تايواني مش أصلي ومبادئه زي الشقة المفروشة .. سبحان الله بتلاقي علامات النفاق والكدب على جبينهم واضحة ومنقوشة.. فاكرين انهم ضامنين صوتك مدام فلوسهم دايما حاضرة ومرشوشة.. لو بعت صوتك حتبيع بلدك وعِرضك وكأنك قتلتها بطلقة خرطوشة.. لو بعت صوتك صدقني تبقى تستاهل اللي حيجرالك وكمان تستاهل ضرب البرطوشة..!!
حتلاقي مرشح قال يعني خايف عليك وقال يعني عنده ذمة.. وبيقول خطب ومواعظ وهيمان في حُبك ودايب في حُب الأُمة.. وتلاقي كلامه كله نفاق وأونطة بيسد النِفس ويجيبلك غُمة.. صدقني لو صدقت كلامه حتلاقي حياتك بؤس وتجيلك حُمّى.. باختصار اللي يفرط في صوته يبقى جبان ومرتشي وكمان واطي ورِمّة.. صوتك هو شرفك وعرضك لو فرطت فيه تبقى مواطن ضعيف الهِمة.. لازم تختار النائب الصالح من غير ما تحتار لأنه ببساطة صوتك هو الدليل عالذمة.. كفاية تعيش طول عمرك لابس طرطور وتسيب نائب من اياهم ينشل صوتك ويلبسك العِمة..!!
يعني من الآخر لازم تعرف ان العين عليك والعالم مستني قرارك.. وان الفرصة جت ووصلت لِعندك لِحد دارك.. في الحق خليك واضح وصريح ولا تنافق قرايبك ولا حتى جارك.. لو فرطت في صوتك يبقى انت الوحيد اللي حتنكوي بنارها وتزيد عليها لهلبة نارك.. وماتقولش أختار مين وازاي ولا تقوللي انه خلاص غُلب حمارك .. اختار صح تعيش في أمان وتطلع الشمس بكرة تنوّر نهارك.. يارب تكون انتخابتنا شريفة ونزيهة زي ما وعدنا كبيرنا الريس مبارك..!!
أرجوك فتح عينيك وخد بالك من شغل التلات ورقات والبوليتيكا.. وحاول تعرف الصوت الصادق والنشاز مهما كانت الأوركسترا والمزيكا.. نواب القمار والقروض لازم يختفوا من حياتنا لازم يتمسحوا بأستيكة.. تفتكر ممكن نعمل انتخابات زي مابنشوفها في أوروبا وأمريكا.. ونصحى ونفتح عينينا ونشوف بانوراما من الديموقراطية من غير لا شيكا ولا بيكا.. يااما انتخابات نزيهة أوتفضل صورتنا قدام العالم مسخرة وأنتيكة.. لو اتزورت ارادتنا يبقى كفاية علينا نفطر ملوخية ونتعشى بامية أو ويكا.. ونستنى الزعيم في فيلمه الجديدأو نسمع شيرين في ماشربتش من نيلها ونرقص مع دينا على دقي يامزيكا..!!
Said_elmasryfahmy@hotmail.com
وأخيراً صرح مصدر مهم قوي واللي عن الانتخابات مسؤول.. وياريته زي ما أعلن عن مواعيد الانتخابات كان فسّر أسباب زيادة أسعار الطماطم والفول.. وليه سايبين أسعار اللحمة والخضار واكلانا كده زي الغول.. الكل سُكتم بُكتم لا فيه احساس بالناس ولا أي همس أو قُول.. سيبك انت المهم انه أعلن عن موعد الترشيح وحنلاقي أصحابنا اياهم طبعا حيقدموا أوراقهم على طول.. ورغم الفضايح والبلاوي والأداء السلبي الفج المشلول.. أكيد حيقدموا أوراقهم بكل بجاحة وكأن الرأي الشعبي ضارب بانجو أو مسطول.. مش عارف معتمدين على ايه ياترى على حزب ولا الفتونة بمبدأ خلي اللي يقول يقول.. لكن ياترى مين اللي حيديهم صوته بنفسه أو يبعته رسالة عالمحمول.. ومين اللي حيقدر يكفينا شر الوجوه دي ويحقق المأمول.. باختصار كل واحد حر في البلد دي وهو عن مستقبله مسؤول.. كفانا بقى سلبية في مستقبلنا ونحاول نخلي صوتنا بالكبير موصول.. ويعرف اننا قررنا نغير سلوكنا ونشارك بصوتنا ونطوف بلدنا بالعرض والطول.. حنشارك بصوتنا ونبني بلدنا ونفضفض عن رأينا المحبوس في القلب ومغلول .. عزيزي الناخب شارك بصوتك لو سمحت لامتى حتفضل عبيط ودلدول..!! انتخابات مجلس الشعب اللي جاية مرحلة مهمة ومصيرية.. ولو فكرت فيها حتعرف ايه هو سر القضية.. لأنها بتورينا ايه اللي مستنينا في أيامنا اللي جاية.. وهي المراية وهي البداية وصورتنا بالألوان الطبيعية.. ياترى حنقدر نلون صورتنا وللا حنخليها أبيض وأسود هباب كده زي ما هي.. الألوان بتظهر لينا التفاصيل الدقيقة والكرمشة والبلاوي المستخبية.. الألوان بتفضح المستور وبتعمل زووم وبتكشف صورتنا الحقيقية.. يبقى أولى نبحلق عنينا ونراقب نوابنا ونحاول نطهر حياتنا النيابية.. النائب هو الرسول اللي بيوصل للمسؤولين أمانينا ومطالبنا المنسية.. النائب هو العنوان الحقيقي لوعي الناس والتعبير عن احساسهم بالمسؤولية.. قدامك طريقين ياتختار راجل محترم يعبر عن صوتك ياتعيش زي ما انت كده غرقان في القرع والملوخية.. صوتك أمانة أوعى تفرط فيه وبص لمستقبل وطنك مش لمصالحك الشخصية.. اياك تبيعه لأي واحد مهما كان ولو عمل لك البحر طحينة أو وعدك بتحقيق أمنية.. انت حُر في صوتك يا اما تتهنى بيه يا اما تلبس خازوق أو سُلطانية.. لكن قبل ما تفرط في صوتك افتكر بكره وكمان مستقبل ولادك وقبل منهم المحروسة بهية..!!
اياك وأوعى تتغر بحضرة المرشح اللي داخل بالحنجل والمنجل عليك.. عاوز ياكل مخك بالوعود عاوز يجرجر رجليك.. صوتك أمانة وغالي قوي أوعى يطير من بين ايديك.. لازم تحافظ على صوتك وتديه للي يستاهله وتحطه في عنيك.. صوتك لو تعرف قيمته حتعرف انه هو الشيء الوحيد الباقي في الدنيا ليك.. لو ضحكوا عليك وسرقوا صوتك يبقى العيب مش فيهم وأكيد حيكون فيك.. لو فرطت في صوتك أوعى تيجي وتشتكي من ظلم الحكومة وخليها بقى تربيك.. لو فرطت في صوتك ماتطالبش باصلاح بعد كده وروح ادّن في مالطة زي الفرخة من غير ديك..!!
اياك تاكل الأونطة من مرشحين تلاقيهم داخلين عليك بأفكار ملطوشة.. يعشموك بالأحلام وكل وعودهم وهمية ومغشوشة.. واللي منهم تايواني مش أصلي ومبادئه زي الشقة المفروشة .. سبحان الله بتلاقي علامات النفاق والكدب على جبينهم واضحة ومنقوشة.. فاكرين انهم ضامنين صوتك مدام فلوسهم دايما حاضرة ومرشوشة.. لو بعت صوتك حتبيع بلدك وعِرضك وكأنك قتلتها بطلقة خرطوشة.. لو بعت صوتك صدقني تبقى تستاهل اللي حيجرالك وكمان تستاهل ضرب البرطوشة..!!
حتلاقي مرشح قال يعني خايف عليك وقال يعني عنده ذمة.. وبيقول خطب ومواعظ وهيمان في حُبك ودايب في حُب الأُمة.. وتلاقي كلامه كله نفاق وأونطة بيسد النِفس ويجيبلك غُمة.. صدقني لو صدقت كلامه حتلاقي حياتك بؤس وتجيلك حُمّى.. باختصار اللي يفرط في صوته يبقى جبان ومرتشي وكمان واطي ورِمّة.. صوتك هو شرفك وعرضك لو فرطت فيه تبقى مواطن ضعيف الهِمة.. لازم تختار النائب الصالح من غير ما تحتار لأنه ببساطة صوتك هو الدليل عالذمة.. كفاية تعيش طول عمرك لابس طرطور وتسيب نائب من اياهم ينشل صوتك ويلبسك العِمة..!!
يعني من الآخر لازم تعرف ان العين عليك والعالم مستني قرارك.. وان الفرصة جت ووصلت لِعندك لِحد دارك.. في الحق خليك واضح وصريح ولا تنافق قرايبك ولا حتى جارك.. لو فرطت في صوتك يبقى انت الوحيد اللي حتنكوي بنارها وتزيد عليها لهلبة نارك.. وماتقولش أختار مين وازاي ولا تقوللي انه خلاص غُلب حمارك .. اختار صح تعيش في أمان وتطلع الشمس بكرة تنوّر نهارك.. يارب تكون انتخابتنا شريفة ونزيهة زي ما وعدنا كبيرنا الريس مبارك..!!
أرجوك فتح عينيك وخد بالك من شغل التلات ورقات والبوليتيكا.. وحاول تعرف الصوت الصادق والنشاز مهما كانت الأوركسترا والمزيكا.. نواب القمار والقروض لازم يختفوا من حياتنا لازم يتمسحوا بأستيكة.. تفتكر ممكن نعمل انتخابات زي مابنشوفها في أوروبا وأمريكا.. ونصحى ونفتح عينينا ونشوف بانوراما من الديموقراطية من غير لا شيكا ولا بيكا.. يااما انتخابات نزيهة أوتفضل صورتنا قدام العالم مسخرة وأنتيكة.. لو اتزورت ارادتنا يبقى كفاية علينا نفطر ملوخية ونتعشى بامية أو ويكا.. ونستنى الزعيم في فيلمه الجديدأو نسمع شيرين في ماشربتش من نيلها ونرقص مع دينا على دقي يامزيكا..!!
Said_elmasryfahmy@hotmail.com
